Parlamentario Mervin Wyatt-Ras ta trece su preocupacion un biaha mas padilanti pa loke ta trata e cantidad di casonan di COVID 19. A manda pregunta pa minister Dangui Oduber, sin embargo Wyatt-Ras no a ricibi contesta.
Wyatt-Ras a tuma nota di declaracion di sr. Jacobs di SVB y AZV encuanto pashentnan cu ta ser manda pa Colombia. Cada pashent segun sr. Jacobs ta costa 50 mil florin y a manda 12 caba, mustrando asina e impacto cu tin riba e fondo, nificando cu si keda manda mas pashent den exterior, ta crea mas gasto cu a premira pa e fondo di AZV.
Sra. La Sorte-Henriquez di AHATA a trece padilanti cu hotelnan ta raportando cu ta sigui ricibi cancelacion debi na e nivel cora cu Aruba ta aden actualmente segun CDC. Aki por mira e impacto cu e cantidad di casonan tin riba nos pilar economico di mas grandi.
Cifranan di DVG ta indica cu tin un total di 97 caso nobo di COVID-19 cu a keda registra, di cual 1 ta turista y 96 ta residente. E cifranan aki ta representa un ‘Positivity Rate’ bou di residentenan di 26%. E cantidad di casonan activo di COVID pa awe ta 1057 y e cantidad di fayecidonan a aumenta na 124 cu fayecimento di 2 residente y un turista di cual nan edad ta varia entre 63 cu 65 y ningun tawata vacuna.
Tin un aumento di casonan nobo cu un average semanal di 105 caso pa dia y un average di ‘Positivity Rate’ semanal di 27% pa dia.
Preocupante ta alabes cu tin actualmente 70 persona interna cu COVID den Hospital di cual 8 ta den ICU na Aruba, 13 den ICU na Colombia, 47 riba piso general na Aruba y 2 riba piso di maternidad na Aruba.
A base di loke ta menciona Wyatt-Ras ta cuestiona e maneho di gobierno al respecto. Mirando e cantidad hopi halto y creciente di casonan y fayecimentonan, e gastonan halto tanto di hospital como di Colombia, e scarsedad di profesionalnan medico y di enfermeria, e parlamentario ta puntra su mes si Gobierno ta warda te lo extremo prome cu bin cu mas control ariba e reglanan di higiena. Wyatt-Ras ta constata cu Minister ta enfatisa solamente vacuna sinembargo tin persona cu no ta y lo no vacuna.
Enbes di bai en contra di e personanan aki y enfatisa solamente vacuna lo mester zorg alabes pa tur e reglanan di higiena por ser implementa den tur sentido di palabra y den tur establecimento. No mester warda te ultimo pa bin cu medidanan drastico. Ta necesario mas estimulo y control si medidanan di higiena ta ser implementa. Un djies ora skolnan habri e contagio lo por aumenta mas ainda. Pa muchanan bou di 12 anja cu no por ser vacuna, e medidanan di higiena lo ta sumamente importante pa ser controla.
Wyatt-Ras ta mira y ta ser aserca dor di ciudadanonan cu ta preocupa paso ta constata cu ainda tin hopi ciudadano cu no ta tuma distancia social ni ta bisti tapa boca. A sabiendas cu aunke cu un persona ta vacuna e por ser contagia y transmiti e virus pa otro persona ta di importancia pa mas ainda enfatisa medidanan di higiena banda di vacuna.
Wyatt-Ras ta haya cu gobierno mester haci un bon evaluacion di su strategianan y no warda ora baca hoga pa bin comanda y tuma medidanan drastico riba nos pueblo. Wyatt-Ras ta spera alabes cu cada ciudadano por carga responsabilidad y proteha, no solamente su mes, sino tambe otro. Hunto nos tin cu lucha pa vence e virus devastador aki.
