Parlamentario, drs. Mervin Wyatt-Ras cu conoce Parlamento door en door a dirigi e proceso di huramentacion di miembronan di Parlamento elihi ayera y a dirigi e reunion pa nombra un presidente y vice-Presidente di Parlamento. Esaki a base di articulo III.12 inciso 2. den cual articulo ta stipula cu den caso no a nombra un presidente y vicepresidente ainda ta e presidente of vice-presidente di e constelacion anterior ta fungi como presidente di Parlamento y si nan no ta den e constelacion actual ta fungi como presidente e presidente kende a sinta mas anja den Staten. Wyatt-Ras pues ta e persona aki. 

Wyatt-Ras a yama bonbini na su Exelencia Gobernado di Aruba, sr. Alfonso Boekjoudt pa efectua e huramentacion di parlamentarionan parti mainta.

Un total di 20 Parlamentario a huramenta di diferente partido Mep, Avp, Raiz, Mas y Accion 21.

Drs. Mervin Wyatt-Ras ta den Parlamento desde anja 2001, di cual pa 2 anja e tabata Parlamentario independiente. Esaki ta di 3 ocasion cu Wyatt-Ras ta fungi como Presidente di Parlamento: 2005-2009, 2016-2017 y awo 8 di juli 2021. Wyatt-Ras ta considera esaki como un honor pa sirbi su pais y pa fungi como dirigente di e organo di mas halto di pais Aruba. Ademas e ta considera e temporada aki y esun na caminda como un reto grandi pa traha como sirbido di nos pueblo. Nos pais ta confrontando problemanan grandi pa loke ta trata nos finansas publico, nos economia, salubridad publico, ensenjansa, sector social y nos estado di derecho ta ser menasa. E resultado di eleccion ainda no ta ser acepta dor di nos pueblo pa motibo di iregularidadnan rond di votacion, conteo y control. E parlamento aki mester garantisa democracia. E voz di pueblo mester keda rezona den Parlamento cu respet pa opinion di tur sin excepcion ningun. Nos mester garantisa un bon estado di derecho, segun Wyatt-Ras. Na e presidente Vrolijk y vice-presidente Tevreden cu a ser elihi e ta desea exito cu e trabou. En bista cu ainda nos presupuesto 2021 no a ser aproba ta necesario pa nos miembronan por haya debido tempo pa lesa esaki y prepara nan mes pa e debate al respecto. Wyatt-Ras ta spera cu e presidente aki si lo duna parlamentarionan suficiente tempo pa nan prepara nan mes debidamente riba discucionnan. Alabes e ta spera cu e nivel di parlamento por subi cu debatenan a base di contenida y no solamente politikeria. E ta spera alabrs cu preguntanan cu parlamentario ta haci na ministernan por wordo contesta. Ta keda na cada parlamentario pa elevez e organo di mas halto di pais Aruba.