Parlamentario drs. Mervin Wyatt-Ras ta lamenta cu gobierno no por a yega na un solucion cu SOGA y contratista OHL Arellano, motibo pa cual e contratista a bandona nos isla. Esey Wyatt-Ras a expresa diamars mainta durante conferencia di prensa semanal di Partido di Pueblo Arubano (AVP) cu a biaha aki a tuma luga dilanti di sede di Fundacion Lotto pa Deporte.

Hunta di Directiva di Dr. Horacio E. Oduber Hospital (HOH) a manda un carta dia 3 di maart 2023 ultimo pa miembronan di su personal, informando nan cu e contratista a para trabou door di un disputa. Por a compronde cu e contratista OHL Arrellano no por a traha mas cu Stichting Onroerend Goed Aruba (SOGA), basa riba diferencia di opinion, cual a pone cu e contratista a dicidi di bandona nos pais rumbo bek pa Merca.

Esaki, segun Wyatt-Ras a indica, tin su impacto no solamente riba e pashentnan, pero tambe riba tur empleado di e contratistanan local, kende abruptamente a keda sin trabou. Den resultado, e proyecto di ampliacion y renobacion di nos hospital, ainda ta bay conoce un aumento den su retraso. “Tur hende sa tambe cu e minister encarga cu salubridad publico nunca tabata di acuerdo cu e contratista OHL Arellano, paso segun e, nan no mester a gana e destaho y su preferencia tabata pa un compania,”asina e parlamentario di AVP a expresa.

Mas aleu a splica cu tanto tempo cu e minister aki tabata den parlamento, como ora el a bira minister, el a keda haci lo posibel pa para e proyecto aki. Y desde cu e ta den gobierno, na aña 2017 te awor na 2023, esta pa 7 aña; el a trata di boicotia a proceso di ampliacion y renobacion y awor el a caba di corona e hecho cu un cantidad di trahado di contratista mester a bay cas.

Di informacion cu Wyatt-Ras a obtene, a compronde cu hustamente tabata renobando e parti bieu y cu mester a keda cla na april di e aña aki. Esaki ta representa apenas un 10% di e trabou y ta loke tabata falta pa keda cla y cu contratista Arubiano por finalisa e proyecto. E expectativa tabata cu, pa april, hospital lo por atende bek e capacidad completo di cliente y tur cos lo a bay bek na normalidad.

E parlamentario ta consciente di situacionnan cu a bin dilanti durante e construccion, manera lekmento y otro. Sinembargo, ta kere cu den tur proyecto di un magnitud asina, semper tin inconveniente y imprevisto cu ta presenta, pa cual partidonan mester por sinta na mesa, dialoga y yega na solucion. Esey ta bira dificil ora bo tin un minister cu nunca a gusta e contratista y ta haci tur cos na su alcance pa stroba nan.

Pa refresca memoria di tur hende, esaki ta e mesun minister cu a core cu director anterior di hospital, a purba core cu director di Directie Volksgezondheid, pero Corte a dicidi cu e tin derecho di keda. Tambe Oduber a core cu director di AZV, a core cu directiva y hunta di supervision di Fundacion Lotto pa Deporte y awo tambe e contratista di hospital, pa su capricho personal di habri caminda pa apunta su aliadonan.

Pa propio admision di e presidente di SOGA, John Hodgson, “Den tur ocasion anterior cu a surgi un diferencia di opinion, SOGA y OHLA semper a sa di yega na solucion, basa riba stipulacionnan den e contracto di construccion,” kico a pasa cu a pone esaki cambia.