Parlamentario drs.Mervin Wyatt-Ras hunto cu fraccion di AVP a entrega 681 pregunta relata na presupuesto 2024 di pais Aruba. Esaki a pesar cu gobierno aki tin e fishi di no contesta mayoria di e preguntanan.
En todo caso e presupuesto 2024 di pais Aruba atrobe no ta cuadra cu e realidad. Locual tabata e caso tambe pa presupuesto 2023 y otro presupuestonan anterior di e gobierno aki cu a perde tur nocion di kico ta reina den pueblo. E presupuesto pues no ta basa riba realidad sino riba Lala land.
Raad van Advies tambe un biaha mas a critica e grado di realidad di e presupuesto aki: “De Raad merkt op dat zij het realiteitsgehalte van meerdere cijfers in het ontwerp en het gestelde in de toelichting beperkt acht. De voornaamste reden hiervoor ligt in het ontbreken van de koppeling tussen de geraamde cijfers en de belangrijkste uitgangspunten van de ontwerplandsverordening, zijnde het landspakket en de SDG’s”. Es decir ta papia di SDG’s y landspakketten pero nan no ta conecta na e cifranan di e presupuesto. Nan ta gritonan sin contenido.
Ademas ta gaba cu surplus sinembargo esaki ta basa solamente riba e medionan financiero. Gobierno ta tuma medida pero no tin dominio riba su gastonan: “Voor 2024 is zowel voor het land als voor de collectieve sector een financieringsoverschot van boven di 1,0% geraamd, maar deze ramingen berusten uitsluitend op de toename van de beschikbare middelen. Aan de noodzakelijke kostenbeheersing wordt onvoldoende invulling gegeven”.
Ki bal bo ta gaba cu bo tin placa cu ta resta pa Hulanda kere gobierno su “Lala verhaal” sinembargo esaki no ta substancia paso gobierno ta keda tuma medida pa pueblo humilde keda paga pa e gastonan di gobierno cu ta sigui subi. Esey ta e realidad cruel cu e gobierno aki no ta bisa pueblo. Chica for di nos ciudadanonan cu ya no tin mas. Tin mas famia den pobresa cu ni por come na drechi y di cual a kita nan awa y coriente, pa gobierno si keda hisa su gastonan di autonan caro y di luho, biahenan pa Morocco, Dubai, Colombia, Merca, etc. y keda paga amigo y famianan pa servicionan di abogado y keda nombra amigo, famia, hasta bysides.
Wyatt-Ras ta hopi desapunta tambe riba e atencion marginal cu tin pa e sector social. Den e presupuesto e ministerio encarga cu asuntonan Social y Husticia ta focus mas tanto riba e aspecto represivo di Husticia. E Family Justice Center no a keda instala pa motibo di edificio, mientras cu mas esencial lo mester ta cooperacion entre profesionalnan di e diferente instancianan.
Wyatt-Ras ta trece padilanti cu e gobierno aki a ocasiona crisis den sector social, a baha e poder di compra di nos hendenan y a corta asina hopi den cuido dor di cual tin un crisis di salubridad y nos tin klassezorg paso hende cu tin placa so por bay dokter y bira bon paso hende pober no por paga pa remedi. E gobierno aki tambe a ocasiona crisis den enseñansa y a crea klasse onderwijs paso ta yiunan di mayornan cu por paga schoolgeld, airco geld y laptop so por bai skol. Sin papia mes di caos financiero cu tin actualmente cu tur medida y specialmente 7% di BBO na frontera cu a caba di kibra e negoshinan (chikito) cu si ta cumpli cu impuesto sin touch cu esunnan cu ta haci negoshi preto. E gobierno aki a ocasiona alabes un crisis estatal kitando derechonan cu nos pais a obtene for di lucha tenaz di nos antepasadonan y sacrificio, hasta di omo di e promer minister. Tur esaki e gobierno aki a lubida y a bende nos autonomia cu Hulanda. E wega cu Evelyn Wever-Croes ta hunga ta di bisa cu a cambio pueblo por sigui haya salario y ayudo di likides. Sinembargo e otro islanan den Reino ta haya tur sorto di sosten hasta financiamento di tur nan debe sin entrega mucho.
Evelyn Wever-Croes ta caba di bay di acuerdo cu tur condicion di Hulanda y ya caba a acepta cu Hulanda ta bay pasa un Rijkswet den Tweede kamer pa regla control financiero di nos pais sin cu representantenan di pueblo di Aruba tin algo di bisa, y di cual mayoria tabata contra. Sinembargo e ta bin Parlamento cu su cara di palo pa haci manera ta parlamento di Aruba ta dicidi. E promer minister aki di dos cara no tin empatia pa e realidad na Aruba. E ta biba den un bubble. E ta biba den Lala land. Biba lekker y laga otro sufri. E ta “Feest vierend” mientras su pueblo ta “gaat ten onder”. E ta ehecutando su pampflet cu el a parti tur caminda na Hulanda promer cu aña 2014 titula: “Feestvierend ten onder gaan”. Ta Pesey Hulanda a bin y exigi gobierno di e tempo ey pa introduci CAft. Y awe mira con e mentiranan di Evelyn Wever-Croes ta bin pa e mes. Tur locual el a sembra e ta cosecha awe. Ta p’esey gobierno Hulandes ni e Secretario di Estado van Huffelen no tin confiansa mas den dje y su gobierno. Ta pone presion riba dje paso desde aña 2019 nos pais no a mira niun jaarrekening di e gobierno aki pa asina duna cuenta na drechi kico a haci cu placa di pueblo.
Ken cu ta ta haci kico cu ta y tur cos ta bay con cu ta. Nan mesun palabra ta pas pa nan awor.
Cu ya el a acepta e Rijkswet por tuma nota di dje den e presupuesto 2024. E ta basa henter e presupuesto su cifranan riba e areglo cu Hulanda pa cual Hulanda a pone como condicion pa Aruba acepta un Rijkswet. Manera e mes a contesta Raad van Advies: “Vooruitlopend op het resultaat van deze onderhandelingen is bij het opstellen van de Landsbegroting reeds uitgegaan van een door Nederland geboden gunstig rentepercentage van 3.5%”. Pero e porcentahe aki ta ser otorga cu e condicion cu Aruba ta acepta cu supervision financiero ta ser regla den un Ley di Reino.
Awor Evelyn Wever-Croes ta bira e cuenta y kier tira terminologianan di Lala land manera “hybride”, pa e haci comosifuera nos ta keda cu tur derecho. E derechonan aki a ser perdi, pero den Lala land e ta pone tur hende kere cu nos ta keda cu tur derecho. Pero den su contesta riba conseho y preguntanan di Raad van Advies por mira cu el a acepta tur cos caba. Pues palabra por ta biento pero su contesta preto riba blanco ta loke ta conta. Siguramente segun Wyatt-Ras e presupuesto lo ser gebulldozed atrobe den Parlamento, mientras cu e no ta cuadra cu nos realidad di tur dia y ta basa riba Lala land, esaki mientras nos pueblo tur dia ta bira mas y mas pober.
