Ayera Parlamentario Mervin Wyatt-Ras hunto cu lider di partido AVP, MR. Mike Eman, a ricibi un recorido den hospital, durante cual nan por a experiencia e bunita trabou di enfermeronan y dokternan cu ta trata pashentnan, specialmente pashentnan di COVID-19. Ambos a ser ricibi dor di presidente di Raad van Bestuur, Sr. Jaco Vroegop, dr. Latour, dr.  Selene Kock, dr. Denert y Sr. Croeze. Por a tuma nota di e bon trabou cu enfermeronan y dokternan, hunto cu longartsen ta desplegando na hospital. Palabra di aprecio, elogio y sosten ta bay pa nan. Dor di e cantidad creciente di pashentnan di COVID den e seccionnan designa pa esakinan y e cantidad di profesionalnan cu a ser contagia cu e virus, e presion a crece riba e diferente profesionalnan di cuido.  

E intencion di e bishita tabata pa scucha di dunadonan di cuido kico ta nan preocupacion, specialmente pa loke nan a trece dilanti den nan carta fecha dia 12 di Januari 2021. E carta ey a ser trata den un reunion di comision di salubridad di Parlamento. Presente tabata un cantidad di 16 stakeholders di diferente entidad y instancianan, manera e.o. e presidente di Raad van Bestuur di hospital, director di IMSAN, presidente di Raad van Bestuur di Respaldo, director di SABA, presidente di HAVA, secretario di e Asociacion di Boticanan, presidente di ASHA, presidente di Asociacion di Parteranan, presidente di Asociacion di Apothekers, presidente di VMSA, presidente di Asociacion di Fisioterapistanan, presidente di Asociacion di Dentistanan, director di Laboratorio di Servicio, presidente di Asociacion di Specialistanan den Loondienst, presidente di ABV y tambe representantenan di hospital.

Dicho stakeholders a trece padilanti den nan carta dirigi na Parlamento cu nan ta desea pa medidanan no ser tuma manera awor ta e caso den cuido. Nan deseo ta pa sinta na mesa cu gobierno pa stop e medida di 60 miyon florin den cuido. Pa asina por yega conhuntamente na proposicionnan pa reforma cu por conduci na reduccion di gastonan di AZV. Nan tin diferente proposicion cu a ser indica den e carta cu a ser manda tanto pa Parlamento como pa gobierno y gobernador. Segun Parlamentario Wyatt-Ras ta lastima cu e minister di Salubridad no a consulta cu stakeholders prome cu el a introduci e medidanan. Prome Minister a core bay Hulanda firma prome cu tur otro pais, sin dialogisch debido cu gremionan.

Parlamentario drs. Mervin Wyatt-Ras aalbes ta lamenta profundo e forma con minister Xiomara Ruiz-Maduro ta core skirbi ariba su pagina di facebook cu lider di AVP y Wyatt-Ras lo ta hunga cu sentimento di pueblo y manipula y gaña. Esey ta tipifica e forma di pensa di miembronan di e gobierno aki cu na momento cu cuestiona nan y cu ta busca informacion cu nan no ta of kier duna, nan tin e derecho di ofende bo. Specialmente e minister ey cu te hasta lo ta dispuesto di manda su cacho Sweety bo tras.

Ta resulta cu e si ta gaña paso loke e ta indica riba su pagina di facebook ta fake. Paso e minister aki y su coleganan kier laga henter pueblo kere cu ta Hulanda ta pusha nos cu medida, mientras cu nan mes a propone y acepta e medidanan aki.

Specialmente e prome minister, cu kier ple “de beste van de klas” cu na momento e kier a firma cu Hulanda el a yama gremionan hunto pero no a dialoga cu nan sino a dies anuncia kico el a dicidi. En bes cu minister Maduro a mustra su balentia pa discuti cu Hulanda y convence nan pa no tin mester di tuma asina hopi medida e no a haci esaki y awor kier acusa otro hende. Ta lastima cu nos pais mester depende di personanan como tal pa representa nos interes. A scoge pa entrega tur cos cu tin. Wyatt-Ras ta haci ademas mencion di e carta cu stakeholders den cuido a entrega na Parlamento. Den e carta aki e stakeholders a trece padilanti cu Minister Knops durante su bishita na Aruba recientemente a indica cu como condicion di Hulanda pa e diferente tranches no necesariamente Aruba lo mester tuma medida den cuido:

“Tijdens het bezoek afgelopen week heeft Staatssecretaris Knops laten weten dat er geen noodzaak is om de afgesproken korting op de tranches uit Nederland per se via de zorg binnen te halen”.

Si Xiomara Ruiz-Maduro ta bisa cu lider di partido Mike Eman y nos di fraccion no ta papia berdad anto Xiomara ta acusa henter e Mundo di cuido na Aruba cu nan ta gañando.

Ta keda awor na minister Dangui Oduber pa por cumpli cu veld di cuido. E ta pusha e responsabilidad riba Hulanda y AZV mientras ta claro cu ta e y su coleganan di gabinete Wever-Croes ta responsabel pa tur medida cu a ser tuma y cu sigui wordo tuma.

Pa haya mas claridad encuanto gastonan real di AZV, Wyatt-Ras a manda 20 pregunta pa minister di Salubridad pa contesta nan. E preguntanan ta regarda entradanan y gastonan di AZV den e ultimo añanan, cual ta e cuido nan cu a ser posponi of tin retraso y pa cual suma, gastonan di tratamentonan den exterior y si tin espacio financiero pa preveni medidanan di austeridad. Ademas a haci pregunta encuanto loke minister Knops a menciona, esta cu por corta otro sectornan y no necesariamente solamente den cuido.