drs. Mervin Wyatt-Ras (AVP): Gobierno no ta sincero cu su medidanan den cuido medico

Durante conferencia di prensa di partido y fraccion di AVP, drs. Mervin Wyatt-Ras a cuestiona e medidanan cu lo ser tuma door di gobierno ariba lomba di nos pueblo.

Wyatt-Ras ta referi na un reunion ayera cu director di SVB y di AZV, ir. Edwin Jacobs hunto cu un delegacion di experto. Wyatt-Ras tin elogio pa dicho director cu semper na un forma transparente ta consulta cu Parlamento prome cu e bay prensa.

AZV a ser encarga pa cu recortenan den e seguro medico. E ley di AZV ta data di 1992 y e invoeringsverordening ta data di aña 2000. Segun Wyatt-Ras nos por ta orguyoso di tin un seguro medico general caminda cu ora nos como ciudadano bira malo nos por acudi mesora pa ricibi cuido medico.

Na momento cu na mei di 2020 minister Wever-Croes tabata deliberando cu Hulanda encuanto de ayudo di likides pa Aruba e mes a propone na Hulanda pa corta den cuido di nos salud cu 60 miyon pa aña, esaki a base di un rapport encuanto “Zorgkosten” di aña 2019. Manera cu Sr. Jacobs a splica den prensa durante aña 2020 cu nos a haya nos mes confronta cu COVID-19 e entrada di AZV a baha drastico pa loke ta trata BAZV y e primanan. Por a tuma nota cu na 2020 tabatin un deficit di 99.7 miyon florin.

Na 2021 ora nos economia y turismo a pick up un tiki e deficit aki a bira 58.7 miyon y awor tin pronostica cu e deficit aki lo bira 64.2 miyon na 2022. Si gobierno corta den cuido lo keda un deficit di 11.6 miyon. Gobierno a acerca AZV y AZV a propone un five wave model di recorte. E modelo aki a ser presenta ya caba na Parlamento anteriormente.

Den e modelo aki tin pues 5 ola:

1. Posponemento di pago, 2. Recorte pafo di ley di AZV, 3. Recorte den ley di AZV, 4. Temporacion di cuido y 5. Reduccion Tarifa & presupuesto UO AZV.

E prome y di dos ola ya caba ta den ehecucion. Ya caba a pone un eigenbijdrage of contribucion di pacient ora nan ser manda den exterior pa tratamento. E acompañante tin cu duna un contribucion di 300 florin pa su pasashi. A corta alabes den daggeld di patienten manda den exterior pa tratamento. Esaki a bira mita di loke e tabata, esta 10 dollar. Tambe a corta den transporte di patienten, p.e. cortamento den dyalise patienten.

Awor ta sigui cu e di 3 ola cu ta limitacion di beneficionan den e ley AZV. E prome proposicion ta pa cortamento of introduccion di un contribucion propio of eigenbijdrage pa Spoedeisende Hulp (SHE) di 15 florin, bishita na Huisartenpost (HAP) di 15 florin, consulta di specialista di 5 florin, pa cada remedi riba un recept di botica (receptregel) lo mester paga 2 florin, pa cada test di laboratorio tin cu paga 1 florin. P.e. si un persona bay specialista , haya 4 medicina riba receta y haci 4 test, e lo tin cu paga 17 florin.

E di dos parti di e tercer wave ta pa introduci recorte den e lista positivo un biaha mas, ya cu aña pasa a corta den e lista aki pa despues stop e paso den campaña e gobierno a pensa ariba voto y a kita dicho medida. Awor e gobierno insincero aki ta bolbe cu mesun medida y kier pas’e via di AZV. Di e 541 ingredientenan activo 90 medicina ta ser saca for di e lista positivo. Di 90 ingredientenan activo, 51 remedi por ser otorga pero bao cierto condicionnan. Ta trata aki di Valium, Diazepam y Omeprazole. Tin14 otro ingrediente activo cu no lo ta riba mercado mas , mientras cu 25 medicina of ingrediente activo no lo wordo cubri mas, cualnan ta Paracetamol,Dica y hoestdrank. Esakinan lo mester cumpra na counter.

Banda di e cortamento aki tin e di 4 y di 5 ola di e modelo presenta. Aki lo bay corta den mandamento di pacient den exterior, lo enfoca riba tratamento di radiologia y di operacionnan di wowo aki na Aruba, gastoperaties, evita medicina caro do inyeccionnan intravitreal, cooperacion HOH y IMSAN, triage di ambulance, destaho di hospitalnan pa haya mihor tarifanan, reduci orario di Botica, contractnan cu specialista lo ser revisa, lo reduci entrada di cierto specialistanan, lo baha cierto tarifa halto di Lab pa uno mas husto y cuido lo mehora cuido prome y despues di manda pacient afo pa scapa gasto.

Ta un cantidad di medida lo bin pa nos pueblo. Sr. Jacobs ta hopi honesto paso e ta menciona cu na aña 2022 no lo yega na e 60 miyon sino na 53.7 miyon florin. Nos fraccion y partido ta cuestiona e medidanan. E gobierno aki no ta sincero. aña pasa na april gobierno a introduci e lista positivo. Ora a mira e reaccion di pueblo, e ministro presidente y minister Dangui Oduber a trek e medida aki bek in. Tabata memey di campaña. E politiconan no sincero aki a bisa pueblo cu nan no lo implementa e medida aki mas y awor nan ta bolbe bin bek cune.

Pa loke ta trata e eigenbijdrage tambe a papia di dje. No introducie mientras awor aki despues di campaña lo introducie. E insinceridad aki ta ser refleha alabes ora tuma nota di e declaracion y e rapport di CAft cu a ser publica a base di e presupuesto 2022 cu nos a haya den parlamento ainda. Den e conseho di Caft na gobierno ta menciona cu gobierno a subi e gastonan di goederen en diensten cu 43 miyon. Caft ta pidi pa baha esakinan. E post di goederen en diensten ta encera diferente gasto operacional e.o. di auto, biahe, productonan di luho y tur producto/material cu ta ser usa, tambe pa friends and family. Por bisa cu di un banda kier corta den cuido di salud di nos ciudadanonan y di otro banda ta aumenta gastonan di luho. Segun Wyatt-Ras si tuma e 43 miyon florin aki por cubri parti di e deficit den AZV. Banda di esey e gobierno insincero aki ta keda nombra tur friends and family. Tur dia tin hendenan ta wordo nombra den e gobierno aki. Nan ta haya contracten hasta lucrativo, anto di otro banda kier corta den pueblo su bida y cuido. Nos ta condena esaki.

Den su e conseho di Raad van Advies pa loke ta trata e ley di Instelling Ministeries (LIM) Raad ta duna di conoce cu gobierno por a corta den su 8 minister haci esaki 7 minister, pasobra tin di e ministerionan no tin suficiente peso, nan carteranan no tin mucho di haci, kiermen cu por a laga un minister keda afo. E conseho aki tampoco e gobierno insincero aki ta sigui y ta keda cu 8 minister, pero si ta bay corta den nos hendenan. Esaki ta inaceptabel pa nos ciudadanonan y nos di fraccion y di partido AVP lo para banda di nos pueblo.