Parlamentario drs. Mervin Wyatt-Ras a reacciona riba loke minister Dangui Oduber a trece padilanti durante su conferencia di prensa encuanto eigenbijdrage pa cuido medico. Aki el a anuncia cu no lo introduci eigenbijdrage mas.

Ta asina cu dia 17 di mei a drenta parlamento e ley of e “Ontwerplandsbesluit omtrent de invoering van eigen bijdragen voor het geldigmaken van de aanspraak op een aantal verstrekkingen en tot wijziging van het Landsbesluit aanspraken genees- en verbandmiddelen (AB 2004 no. 18) in verband met de inperking van de aanspraak van verzekerden op geneesmiddelen ten laste van het Algemeen Fonds Ziektekosten”. Segun articulo 22 inciso 2 di e Ley Ziektekostenverzekering tin un “voortgangsprocedure” y Staten mester haya dos siman pa expresa deseonan y obhecion na minister encuanto di e ley menciona.

Fraccion di AVP a haci uso di su derecho pa pidi un reunion publico al respecto dia 19 di mei 2022 cu presencia di e minister encarga. Sinembargo e presidente di Parlamento no a yama e reunion aki.

A manda un rappel dia 30 di mei pa e reunion aki por tuma lugar pa informa nos pueblo ariba e medida devastador aki. Wyatt-Ras hasta a papia cu e presidente di parlamento pa yama dicho reunion pero el a bisa cu e ta druk.

Dia 1 di juni e medida devastador aki lo a bin na vigor. Awor e minister encarga cu salubridad ta anuncia den su conferencia di prensa cu no lo implementa e medida aki mas. Esaki sigur ta un alivio pa pashentnan.

Di otro banda e minister aki ta culpa lider di partido y fraccion di AVP, mr. Mike Eman pa cu esaki.

Minister Dangui Oduber kier scapa curpa dor di tira tur cos riba AVP y su lider. Segun e mandatario eigenbijdrage ta presenta desde 2014 pa e lider di AVP den dialogo social of “wine and dine”. E ta bagatelisa dialogo social como “wine and dine”, insultando tur gremio. Aki por mira claramente cu e presion ta grandi riba lomba di e minister y e ta busca scapegoat pa tira culpa riba dje. Si a discuti eigenbijdrage na 2014 mes den dialogo pueblo por constata cu e no a ser introduci. Paso un diferencia grandi entre AVP y partido MEP di Dangui Oduber ta cu Mike Eman ta dialoga cu pueblo y cu stakeholders prome cu tuma decision drastico, mientras Dangui Oduber y su partido no ta dialoga sino ta hisa benta dicidi na forma autoritario, basta nan faborece nan propio compinchinan.

Ta bon cu AZV a realisa cu tin hopi ehercicio pa haci pa wak di unda otro por saca placa cu no ta for di e pashent cu no tine facil No por pluma un galiña sin pluma. Wyatt-Ras a haya rason pa su plegaria.

Wyatt-Ras den reunion cu AZV y den prensa a menciona varios alternativa cu por ser explora promer cu tuma medida asina drastico riba pueblo, manera control unda e suma cu pueblo ta paga na BAZV ta bay, mihor cooperacion entre dokternan den promer liña y entre dokternan, specialistanan y institutonan di dos liña. Tambe compra di medicinanan por ser organisa mas conhuntamente of central cu lo baha gasto.

Banda di esey turismo medico por ser stimula pa obtene ingreso. Tratamento oncologico cu ta tuma lugar aki mes por atrae pashentnan den region pa bin tuma nan tratamento aki na Aruba. Tambe tin cu evalua gastonan na hospitalnan den exterior, pa baha dicho gastonan. Tin pashentnan cu ta keda mucho tempo na otro pais wardando tratamento. Aki lo por tin mihor cooperacion pa evita esaki y baha gasto. Wyatt-Ras ta contento cu minister a duna Wyatt-Ras y AVP rason pa bay busca y explora alternativanan en bes di corta en alma di nos pueblo.

Wyatt-Ras ta menciona alabes cu gobierno a faya pa introduci un vangnet pa ciudadanonan por cubri e gastonan di eigenbijdrage. E medida di eigenbijdrage aki sigur lo a crea klassezorg y lo a ocasiona problemanan administrativo cerca dunadornan di cuido, boticanan y laboratorionan y sin control debido lo a stimula fraude mas ainda. Sin papia di e SDG’s cu Aruba no lo por cumpli cu nan, en special SDG 3 cu lo mester garantisa cuido di calidad.

Loke ainda ta keda cu lo bay dal pueblo duro ta e lista positivo cu lo ser austerisa dor di cual nos pueblo tin cu bay paga pa varios medicina. Esaki tampoco no ta un medida aceptabel y gobierno lo mester bay busca otro formanan pa haya ingreso pa e area di cuido.

Aki por mira den ki problema Evelyn Wever Croes a hinca nos y cu lo keda tin su consecuencianan no solamente den cuido sino den tur sentido.

Wyatt-Ras ta señala cu di otro banda gobierno ta keda biba la bida loca cu un minister di Finanzas cu en bes di baha gasto e mes ta keda subi gasto di goederen en diensten contra conseho di CAFT. E minister di Finanzas ta fix su mes un Lincoln ultimo modelo di coriente cu lo mester plug na Cocolishi pa e charge. Tur esaki riba lomba di e mesun pueblo riba cual ta tuma medida di 12.6 % y cu tin cu paga pa su medicinanan y un djis un BTW. Pa colmo e minister di salubridad tambe kier un auto di luho manera di su colega.