Ta increibel e debate cu a surgi den e pais bisiña despues di e – berdadero o supuesto – atake cu drone riba presidente di e pais aki diasabra pasa. Tur cos a keda colga den e incertidumbre di semper unda ta dificil pa e ciudadano comun y coriente descifra e noticianan y saca afo kico por ta berdad. Na e altura aki no tin un claridad ainda si di berdad tabatin un atake planifica, por lo menos parcialmente, for di exterior. Tampoco lo ta cla ta ken anto tur a participa den e intento aki. Como di custumber, inmediatamente e presidente Venezolano a acusa tanto Washington como Bogota di ta tras di e atentado. Y e rapido negacion di ambos banda tambe tabata di anticipa.
Elaborando riba e acontecimentonan despues di e atentado, tin esnan cu ta kere cu ta trata di un accion di cierto elementonan den e filanan Chavista cu a desea di duna Nicolas Maduro un advertencia. Berdad ta cu varios dirigente Chavista tambe ta mira e deterioro economico cu no ta haya un contesta contundente di e presidente y e grupo den su alrededor. Tin malcontento tambe den e filanan militar y policial. Mientras e alto mando ta fiesta hunto cu Maduro y ta beneficiando grandemente di e corupcion organisa, den e cuartelnan ta bira cada bes mas problematico duna esnan di rango comun di come. Prome cu eleccion presidencial na mei ultimo, ya tabatin bastante desercion for di e cuerponan militar y policial, di cual hopi a sali tambe di e pais. Esaki ta duna algo di credibilidad na e teoria cu por tabatin un intento desde exterior, pero cu cierto Chavistanan a logra infiltra e grupo y a laga e suceso tuma luga, pa usa esaki na nan propio beneficio. Un elemento cu ta apoya esaki ta e rapidez cu cual e autoridadnan a trece un detenido dilanti, cu a haci un confesion ‘completito’ y a papia manera e conocido lora. Tur esaki prome cu e fin di siman a pasa drechi… Si esey ta berdad, en todo caso e efectivonan di Guardia Nacional para dilanti no tabata informa, pasobra e manera cu nan a sali na careda a pone forsa arma den ridiculo completo.
Pero henter e sucedido y tur e comentario alrededor ta laga un banda e situacion general den cual e pais ta actualmente. Mientras na varios ciudad casi no tin awa potabel, den region di Orinoco tin inundacion grandi tumando luga. Na estado Zulia practicamente no tin coriente, ni pa e ciudadano pero tampoco pa industria. Scol y universidadnan ta paralisa, pasobra studiante y docente por igual mester busca con pa sobrevivi, igualmente e hospitalnan cu no por trata pacient pasobra no tin ni medicamento ni ekipo. Esnan cu ta sufri di cancer o riñon ta muri o ta depende di loke famia den exterior por aporta. E balor di dollar riba mercado liber ta acercando e marca inimaginabel di 4 miyon bolivar pa un. Como comparacion: na aña 1990, tempo cu e cordoba di Nicaragua no a yega 3 miyon pa un dollar ainda, ya e Sandinistanan a tira serbete, a accede na eleccion liber, a perde y a entrrega poder.
E situacion na Venezuela ta mustra hopi mas serio cu Nicaragua na 1990, pero ta parce cu esnan den poder ta prefera di laga e pais sucumbi totalmente den caos, sin busca solucion, y pa un motibo obvio: negocia solucion, loke eventualmente lo conduci na comparti poder, ta prerogativo di hende normal, y esey no por bisa di e regimen mas criminal di historia di continente Americano. E posibilidadnan di huy bay otro parti di mundo a bira chikito, pasobra e rikesanan cu nan a warda pafo di Venezuela a bay perdi bao di e medidanan tuma pa Estadonan Uni y Union Europeo, entre otro. E idea di horta laga e pais bashi pa bay disfruta di e placa na otro luga, pa hopi di nan lo no funciona y no ta keda nada otro cu resisti te na ultimo consecuencia.
Pa bolbe na e sucedidonan di fin di siman pasa: ta di anticipa cu e persecucion di esnan cu ta contra e narco-regimen aki lo bira mas severo,. Segun tempo ta pasa, e situacion ta birando dia pa dia mas caotico y e Chavistanan no sa nada mas cu loke ta necesario pa mantene poder. Cu un parti di oposicion lo a dicidi pa cuminsa actua cu arma den man, esey ta nan escogencia. Pero na e momento aki un lucha arma clasico no ta logico ni necesario.
Tampoco ta trata di simplemente mata e actual presidente anto manera nan mes ta bisa: ‘se acabó la vaina’. Den casi dos decada e Chavistanan a crea un structura di poder cu ta envolve miles di persona, den ehercito, cuerponan policial, aparato publico, universidad y colegionan, institutonan medico, etc. Ken ta bay haci e depuracion di e forsanan arma y e aparato publico? Por djis organisa eleccion y e partidonan politico tradicional por simplemente ocupa nan lugar atrobe den Asamblea Nacional y sigui cu nan bida? Venezuela tin un caminda largo pa cana pa bolbe na democracia.
