Na momento cu polis federal di Mexico a detene cuatro homber cu tabata core un auto, cu a ser horta na Guanajuato, un siman pasa, ningun di nan a spanta ora cu nan a mira un arma di candela largo AK-47 y cuatro telefon den bahul di e auto. Pero otro obheto cu nan tabatin, si a duna un sorpresa comprendibel.

E aparato tabata parce un bom, manera un aparato explosivo traha na cas cu ta hopi popular pa usa den enfrentamento entre banda di narcotrafico. Pero e aparato tambe tabata parce un drone.

Finalmente autoridad a haya sa cu e tabata un drone/bom, cu un detonador di control remoto. Cu e presencia di e aparato aki, e actitud di autoridad Mexicano pa cu mafia criminal a cambia.

Den un publicacion di revista Small Wars, caminda a publica un nota di Robert Bunker y John Sullivan, nan a señala e importancia di un situacion inevitabel, segun specialista di siguridad. “Tin mas di un decada cu varios grupo criminal ta daña Mexico, cu mas di 100.000 asesinato,” segun e autornan. “Cada biaha ta bira mas importante tur cos relaciona cu tecnica y procedura nobo di banda di terorista, manera uso di escudo humano y awor e aparicion di un drone cu a bira un arma.

Autoridadnan tabata sa cu cartelnan di Mexico ta usa drone pa trafica droga na frontera entre Mexico y Merca: entre 2012 y 2014 nan a registra mas di 150 situacion asina. E gruponan criminal ta usa drone tambe pa haya informacion specifico.

Segun Bunker y Sullivan, e region caminda autoridad a confisca tur e material aki, e caminda di Salamanca pa Morelia, awor a bira un laboratorio di tur cartel cu ta usa tecnologia nobo.

Aunke e polis no a duna claridad si tur hende deteni tin relacion cu narcotrafico, te awor Mexico tin varios cartel cu ta opera den zona di Guanajuato, manera cartel di Sinaloa, Los Zetas y el Cartel Jalisco Nueva Generacion (CJNG). Te awor te dificil pa haya informacion tocante esaki.

Segun specialistanan e ta un metodo cu a ser copia di e organisacion Estado Islamico, cu ta usa drone pa atake suicida. E cartel tabata usa prome un instrumento conoci como papa bomba, pero awor nan ta combina e instrumento aki cu tecnologia di drone, cu por cumpra riba internet pa US$ 229 solamente.

“Agente di siguridad fronteriso a cuminsa cu siguimento di un patron di uso di drone di varios cartel, segun Bunker y Sullivan. “Un auto aereo no tripula arma of un sistema aereo no tripula cu un IED cu por haya e orden pa explota desde un luga remoto y asina por sucede un atake di precision contra un obhetivo intencional”.