Studiantenan emigrante cu ta lucha pa por caba nan studio pa asina sigui bay mas dilanti na un pais afo, ta splica cu no tur ora esaki por ta posibel. E situacion ta forsa nan pa bay traha, cual ta bira dificil tambe paso dunado di trabou no kier firma pa nan.

Directora Kathy Paskel-Ruiz ta splica Bon Dia Aruba cu e proceso pa esunnan cu no a cay bou di ‘Dreamers’ tin cu pasa normalmente pa aplica pa un permiso di trabou, den caso cu ta un persona cu a caba cierto studio aki na Aruba.

Aña pasa DIMAS a bin cu e proyecto ‘Dreamers’ pa personanan cu a bin na un edad hoben y pa motibo di fayo den permiso no por aplica pa nacionalidad, ni pa firma liber. E ta un oportunidad pa por a haya un firma liber pa por keda na Aruba sin mester keda aplica pa permiso cada aña.

Sra. Paskel-Ruiz a splica cu permiso di firma liber ‘Dreamers’ tabata un proyecto cu un cuminsamento y un fin. Den e periodo ey, esunnan cu tabata cumpli cu e rekisitonan cu a wordo pidi, por aplica sin problema.

“A tuma 888 melding, casi 600 a logra haya nan firma liber cu a cumpli cu tur e puntonan. E resto nos a constata cu no a drenta den e peticion. Tin un cantidad cu tin duda pero esaki nan a drenta den e periodo cu a ‘Dreamers’ tabata andando dus por trata cu nan ainda”, sra. Paskel ta splica.

Tin algun posibilidad den futuro

Sra. Paskel ta splica cu awor cu no tin e proyecto ‘Dreamers’, nan no sa con lo bay atende cu caso(nan) similar den futuro. Pero e ta aclara cu e no ta bisa ‘e ta imposibel’.

Sra. Paskel ta splica cu ‘Dreamers’ a cuminsa y a caba. Den caso cu bin cu un maneho nobo lo mester anuncia. Den caso specifico por conseha minister den cierto forma. Si e persona a haci 18, ya e ta conta como mayor di edad. Si e ta studiando ainda, sea EPI of cualkier otro studio y ta biba cu mayornan, e permiso di ‘Voortgezet’ ta posibel te cu 27 aña, conforme e maneho actual. Si esaki no ta e caso, e ora e persona tin cu busca un garante pa firma p’e te ora cu e persona cumpli cu su 120 luna y por aplica pa un firma liber. E garante aki tin cu haci tur e parti administrativo.

DIMAS ta pidi pa ora di verlenging , e dunando di trabou mester ta presente. Den caso e personanan aki a caba un studio y no ta haya trabou, mester pasa DPL cu ta e instancia pa wak si den nan maneho a desaroya pa por registra asina ora tin un trabou cu e persona studia p’e por solicita.

Tambe sra. Paskel a splica cu si e persona ta na Aruba pa mas cu 5 aña, no mester pasa DPL. Nan ta check si e ta traha cu e mesun ‘werkgever’ den e mesun funcion. Si e persona aki ta traha uitzendbureau, e ora si tin cu pasa DPL.

Tin cierto hoben den un situacion di no por haya trabou
Tin cierto hoben cu a caba sea nan MAVO, pa despues sigui cualkier otro studio aki na Aruba y ainda no por aplica pa paspoort of firma liber pa motibo cu tabata tin menos di 10 aña bibando na Aruba. E personanan aki no por a aplica pa e permiso di ‘Dreamers’.

“Mi a caba un opleiding na EPI pa asina mi por traha di locual mi a studia p’e pero e compania no kier firma pami. E ta fastioso paso tampoco mi por traha di locual mi a studia p’e aki. Awo mi tin cu busca otro tipo di trabou”, un hoben ‘Dreamer’ ta splica Bon Dia Aruba.

E hoben tin casi 9 aña bibando na Aruba anto e ta haya e situacion fastioso cu e no por a forma parti di e proyecto ‘Dreamers’. E ta bisa cu manera e tin algun conoci mas cu no por a haya nan firma liber. “Nan por haci pa nos cu a studia aki un manera mas facil pa ora aplica pa permiso. E no ta mucho dificil. Facilita e proceso pa esunnan cu di berdad por traha den locual nos a studia p’e aki na Aruba”, e hoben ta remarca.