E proyecto Dreamers of Kast Kinderen cual tabata un colaboracion entre Departamento di Integracion, Maneho y Admision di Stranheronan (Dimas) y Ministerio di Integracion, entre otro, a termina oficialmente riba prome di juli. E proyecto, cu meta pa yuda mucha y hobennan stranhero residencia na Aruba pa basta tempo adkiri status legal sin tempo defini, ta uno ambicioso, pero lo e por ta un solucion berdadero?

Bon Dia Aruba a acerca un hoben cu recien a haya su permiso di firma liber cerca Dimas via proyecto Dreamers pa expresa su opinion tocante e procedura. Haryanti Amidjojo ta un hoben cu tin mas cu 20 aña residencia na Aruba, a crece riba e isla y a bay scol akinan. “Mi ta hopi contento cu mi permiso firma liber, pasobra esaki ta brinda mi un sosiego di no mester aplica cada aña pa un permiso di estadia. Pero tambe pasobra mi no ta limita pa un trahado cu lo kier firma p’ami. Pero no ta asina cu tur mi problemanan a wordo soluciona pasobra di e permiso aki.”

Segun sra. Amidjojo, ‘hopi cos por bay fout den e procedura di obtene permiso di estadia, y en general pa por haya nacionalidad Hulandes’. “Den mi caso, mi tabatin 7 permiso di reunificacion familiar sin interupcion. Pero ora mi a caba scol mi mayornan no a sigui renoba mi permiso. Ya cu mi no tabata bay scol ni tabata trahando, mi status legal a keda na laira, te cu mi mes a cuminsa traha part-time. Pero como trahado part-time un doño di trabou no lo firma p’ami, pues mi a purba haci avond havo y traha, cual si a permiti mi pa haya un permiso.”

Pero no ta cu situacion familiar of escolar so cosnan por complica, segun sra. Amidjojo, “ora mi a aplica pa mi permiso number nuebe e persona na helpdesk di Dimas a conseha mi pa aplica pa firma liber, cual mi a haci. Mi a clarifica cu mi no tin dies permiso en total, di acuerdo cu rekisito pa firma liber, pero e trahado a sigura mi cu si esaki wordo rechasa por djis aplica di nobo. Locual hende no ta realisa ta cu mas aplicacion kiermen mas placa, y ta di unda e cen mester bin?”

Aparte di esaki, segun sra. Amidjojo, ‘hopi biaha Dimas mes ta crea un buraco den bo estadia door di haci slordig cu papeleo’. “Cu mi nan a haci un fout di rechasa mi, pasobra nan a kere ami ta mi ruman. Ya cu nos tin nomber similar, cu mesun fam y nos potret ta similar, nan a rechasa e peticion pasobra mi ruman a stop di biba na Aruba pa varios aña, pero ami semper a biba akinan.”

Procedura di paspoort

Pa hopi hobennan Dreamers, e permiso firma liber definitivamente ta cambia hopi aspecto di nan bida, pero e meta final lo por ta pa wordo reconoci como Hulandes. E problema ta cu e rekisitonan pa naturalisa of opta pa Nacionalidad Hulandes ta completamente separa di e procedura na Dimas. Un di e rekisitonan basico pa por opta of naturalisa ta cu mester tin permiso vigente durante e procedura, y den caso di naturalisacion mester tin minimo 5 aña cu permiso sin interupcion.

E autoridad final riba peticion pa naturalisacion of opcion ta e Servicio di Inmigracion y Naturalisacion di Hulanda (IND), cual segun Dimas tabata un di e partnernan cu a yuda cu e proyecto Dreamers. Bon Dia Aruba a tuma contacto cu IND. Segun nan, ‘si bo ta bin na remarke pa naturalisacion ta depende si bo persona ta cumpli cu e rekisitonan regular pa naturalisacion, y esaki ta conta tambe pa e Kast Kinderen’. “E hecho cu un kastkind tin un permiso di estadia indefini obteni via e proyecto aki no kiermen cu e persona ta bin na remarke pa naturalisacion. Pa mas informacion por acudi na nos website of Gabinete di Gobernador.”

IND no a specifica den ki manera nan a colabora cu proyecto Dreamers.

Solucion pa hobennan studiante

Pa e hobennan Dreamers e bataya lo sigui, si nan kier wordo reconoci como Hulandes. Un aspecto importante ta cu pa hobennan studiante, e permiso Dreamers no ta brinda e beneficionan cu un paspoort Hulandes ta brinda. Gran parti di studiante Arubano cu ta bay studia den exterior ta depende di Arubalening of DUO lening di Hulanda pa haci nan estudio un realidad, y esaki no ta algo cu un firma liber por drecha.

Segun sra. Amidjojo, mester por bin un reglamento acerca cu ta completa e caminda pa Dreamers por wordo reconoci como Hulandes. “E maneho cu Aruba y Hulanda tin mester por wordo ahusta pa concorda cu otro. No por ta asina cu bo tin e ley di Aruba ta bisa bo un cos y e ley di Hulanda ta bisa bo otro cos. Cu e proyecto aki e inconsistencianan a surgi, y pa soluciona esaki mi ta kere IND mester evalua cuanto aña un persona cu aplica ta inscribi na Aruba y cuanto nan a contribui via impuesto. Si IND a colabora cu Dimas pa e proyecto aki, dicon nan no ta sigui colabora y bin cu un reglamento special pa Dreamers por naturalisa?”

Segun e ley di admision di Aruba (LTUV), si un persona cu tin permiso di estadia indefini stop di biba na Aruba, despues di un aña e permiso ta bira invalido automaticamente. Pues si un hoben Dreamer ta bay afo pa e studia e ta perde su permiso atrobe y si e kier bin bek Aruba bek, e mester aplica atrobe pa un permiso. Esaki tambe ta un punto cu no ta haya mucho atencion den e proyecto di Dreamers. Esta cu e permiso di estadia ta uno indefini solamente si e hobennan ta keda na Aruba.