Minister di Husticia a clarifica e situacion di su yiu durante un momento emocional den Parlamento

E mester tabata un reunion riba con a aplica e decreto nacional pa screening di Minister, pero a bira un relato hopi personal di un tata cu no tin contacto cu su yiu pero cu ta spera cu unabes cu e mucha ta adulto, e lo sa di busca e mayor cu ta stim’e.

Esey tabata e parti mas yamativo di e encuentro publico di Parlamento ayera, unda a invita Prome Minister Evelyn Wever Croes pa duna splicacion con a evalua e candidatonan di Minister, con nan a pasa e screening y si a keda algun duda atras.

Pero locual a domina tabata e storia familiar di Minister di Husticia Rocco Tjon y e hecho cu e no tin contacto personal cu su yiu mayor, despues cu huez civil a pone un paro temporario den contacto entre tata y yiu.

Tabata lider di fraccion di Accion21 Miguel Mansur kende a lanta e prome preguntanan riba e caso. “ Mi a conoce Rocco Tjon na Boneiro. E ta parce mi un hende agradabel. Dus mi ta kere den su inocencia, pasobra locual ta acus’e ta asina hororoso cu ta dificil pa bira un Minister,” Mansur a bisa. Sinembargo, e lider di Accion21 a presenta un sentencia di Corte Superior unda a mustra cu no solamente ta e ex casa, sino hasta e peuterschool a entrega keho contra Tjon di lo a mishi cu su yiu. Y aunke despues e caso a bira uno civil, Corte a bisa cu tin mucho Resistencia di parti di e mama pa por a permiti bishita cerca e tata, den e caso aki Rocco Tjon.

Mester bisa cu na e momento ey Hendrik Tevreden a interumpi y para Mansur, y a bisa cu e forma di puntra tabata mas bien un interogacion y difamacion y cu Rocco Tjon a pasa tur screening. Presidente di Parlamento tambe a bisa cu no por atacha mucha den un discusion politico.

Pero Miguel Mansur a sigui bisa cu e mesun Minister di Husticia cu tambe ta bay ta encarga cu Asuntonan Social a perde su caso civil pa por mira su yiu. Mervin Wyatt Ras di AVP tambe a bin riba e tema di e sentencia den Corte Civil, unda e Minister ta prohibi pa wak su yiu y ta kere cu e Minister mester splica pasobra e ta e cara pa Asuntonan Social cu ta trata cu casonan di mucha y ta promove bon relacion entre mayornan y yiunan.

Rocco Tjon

Durante tur e disertacionnan a nota con Prome Minister Wever Croes y Minister Tjon tabata combersa cu otro. Y ora a toca turno na e Minister di Husticia, e tabata obviamente emociona, a pesar di a trata di controla su mes. El a cuminza pa bisa cu e ta stima su yiu mas grandi (red. pa motibo di privacidad Bon Dia Aruba no ta publica nomber di e hoben), mescos cu e ta stima su otro yiunan. Y cu dia su yiu mas grandi bira adulto, e ta convenci cu e mucha mes lo busca e tata cu ta stim’e.

Tjon a gradici Mansur pa e pregunta, y a bisa cu e ta dun’e e beneficio di duda, pero ta lamenta e nivel di reunion pasobra tin hopi Parlamentario cu tin experiencia riba e nivel social cu mester tabata sa miho.

E Minister a bisa cu ta for 2007 e mester a bringa pa wak su yiu den Corte, pero ta ora cu el a haya derecho pa su yiu por drumi na su cas, cu su ex -casa a lanta locual Tjon a cataloga como un “falsedad.”

Mike Eman, Arthur Dowers y Robert Candelaria a kere den dje

Pero ironicamente, tabata e propio miembro di AVP awe, e tempo Alto Inspector Robert Candelaria den su rapport a bisa cu e mama no kier a entrega un keho formal contra Rocco Tjon y cu unicamente e kier pa e yiu no tin contact cu e tata. Tjon tabata hefe di Jeugd en Zeden Politie y pa e motibo ey nan a investiga e caso mas pisa ainda, el a enfatisa. Despues a bay un carta pa Prome Minister Mike Eman, Minister di Husticia Arthur Dowers y Minister pa Asuntonan Social Michelle Hooyboer Winklaar unda a splica tur detaye. Segun Tjon, locual a conclui ta cu no solamente no tabatin suficiente prueba pa bay un caso penal “no tabatin ningun prueba algun.” Ministerio Publico a ‘seponeer’ e caso, den otro palabra a considera cu no tin motibo pa sigui cu e investigacion penal. E mama a apela e caso y Corte Superior, Hof a dicidi cu OM tin razon. No tin caso. “Tur sentencia ta publico. Locual ta bin dilanti awe ta informacion cu Arthur Dowers tabata na altura di dje.”

Berdad ta cu Tjon a lanta un caso sumario pa wak su yiu, pero e no a gana. El a lesa e sentencia den sala di Parlamento ayera, bisando cu na November 2011 huez no a permiti e contacto cu su yiu, pa motibo di tension entre Tjon y su ex casa. “E supuesto abuso sexual no a hunga un rol den e decision. Y p’esey mi no tin contacto cu mi yiu. Pasobra ma scoge pa bienestar di dje. “ Ademas tin otro sentencia cu ta bisa cu e relacion entre e tata y mama ta asina daña, cu e ta afecta e mucha. Como tal e ta na interes di e mucha, pa e tata y mama elimina e tension. “Mi tabata habri pa comunicacion, pero e mama no tabata kier.” Tjon a bisa cu e sentencia tabata di un caso sumario y e por a cuminsa un caso den prome instancia pero a dicidi contra, na interes di su yiu. “ Mi ta stim’e. E mes ta bay busca mi drechi ora e ta grandi.

FBI y KIA

Locual ta straña Rocco Tjon ta cu tanto ex Prome Minister Mike Eman y ex Minister Arthur Dowers sa tur detaye di su caso. Locual a bin dilanti durante e reunion di screening ayera ta e hecho cu screening di directornan di departamentonan ta hasta mas stringente cu esun di Ministernan. “Tabata e tempo ey Minister Dowers cu a nombra mi pa drenta e FBI Academy. E screening na 2014ntabata pisa y Prome Minister Mike Eman a manda mi un carta pa gradici mi pa e trabou duro. Y na 2016 mi a solicita pa bira Director di KIA, riba presentacion di Minister Dowers. Atrobe mi a pasa e screening, unda Mike Eman a firma mi decreto nacional. Ta Conseho di Minister e tempo ey a dicidi. No tabata MEP cu a nombra mi. E tempo ey, Sra. Wyatt Ras no a cuestiona mi. E unico ora cu e asunto aki a bira un problema ta ora cu mi a lanza mi mes como candidato di MEP.”

Rocco Tjon a bisa cu e ta duel e, ta cu Arthur Dowers sa tur detaye y hasta Mervin Wyatt Ras sa tur detaye, pasobra nan ta famia leu di otro y a discuti e asunto den famia. “Ta duel mi cu net Mervin Wyatt Ras, kende a wak tur documento ta trece e asunto aki dilanti. Pakico no a haci’e na 2010? Pakico no a haci nada na 2016? Pasobra e tabata sa kico ta kico. Pero awor pa motibonan politico, a scoge pa bay e rumbo aki,” Minister Tjon a bisa.

Tata no tin mucho derecho

E Minister a sigui su discurso bisando cu como hende homber, como tata no tin mucho derecho. Un hende muhe por gaña facilmente, a cu tur sentencia por ta na fabor di e tata. E mesun sentencia cu a prohibie contacto cu su yiu inicialmente a bisa cu e provision tabata pa un aña y es mas, cu e por tabatin contacto na momento cu e mucha bira 12. Pero, Tjon a bisa cu pa trankilidad, el a dicidi cu e ta laga su yiu busk’e asina cu e ta mayor di edad. “Mi no ta sigui bida priva di esnan cu a atacha mi yiu. Locual pasa, ta un perdemento di tempo, no ta di balor agrega pa ningun hende.”

E Minister a bisa cu dialuna awor e lo reuni cu e fundacion Ta Basta riba con pa combati abuso di mucha, unda lo contesta kico a haci caba, kico lo haci y kico no lo no por haci. “Asina e Minister aki lo traha.”

Rocco Tjon a pone tur e sentencianan, otro documentonan pa Parlamentarionan por lesa, y a pidi nan si pa no saca potret ni publica nomber di ningun hende, incluso nomber di e persona cu a gaña contra dje. Y a conclui papiando directo cu su yiu pa bis’e cu e ta stim’e.

Edgard Vrolijk

Presidente di Parlamento Edgard Vrolijk a bisa cu e no tabata kier pa e discusion a sosode di e forma aki y a bisa cu e Minister tin hopi curashi. E ta lamenta cu a bay den bida priva di hende. El a tuma e documentonan y a permiti Parlamentarionan wak nan unicamente sinta banda di dje.