(AP) – E tabata manera un evento familiar na Billboard Awards; Pink a haci su presentacion cu su yiu muhe, y Drake, ken a ricibi e premio di Artista di e Decada, a acepta e honor aki cu su yiu homber di 3 aña na su banda.

Drake, ken a surpasa su mesun record como e artista mas decora y honra den historia di e show aki cu 29 premio gana, tabata rondona di amistad- y familiarnan ora cu el a ser presenta como e ganador di e titulo di Artista di e Decada.

“Mi kier dedica e premio aki na mi amistadnan, mi colaboradornan di henter mi bida, mi famia y na mi yiu, Adonis.” Drake a bisa, prome cu el a carga su yiu Adonis.

Drake su prome cantica a drenta Billboard Hot 100 den 2009, y desde e momento aki, a ricibi e record di e cantidad mas grandi di canticanan pa un solo artista, den e Billboard Hot 100. Ademas di e titulo aki, Drake a gana e premio pa “Top Streaming Artist”.

Pink a ricibi e titulo di “Icon Award” y tambe a subi escenario cu su yiu, cu ken Pink a haci su presentacion acrobatico den aire acompaña pa su mesun cantica “Cover Me In Sunshine”, unda cu su yiu tambe ta canta.

“Willow, bo a haci un gran trabao awe nochi, manera semper” Pink a bisa despues di e presentacion, “mi ta stima loke mi ta haci, y mi ta stima e personanan cu mi por haci esaki cune, y nos tur ta bastante bon den loke nos ta haci, pero toch nos kier duna danki na tur esunnan cu ta tuma tempo pa bin wak loke nos ta haci.” Pink ta agrega.

Pink su presentacion ta uno di e hopi presentacionnan cu a tuma luga pafo, unda cu a graba dilanti un audiencia cu tabatin tapaboca bisti.

The Weeknd a ricibi elogio, pa motibo cu e tabata e persona cu e cantidad mas grandi di premio gana riba e anochi aki, cu un cantidad di 10 premio, cual ta entre otro Top Artist, Top Male Artist y Top 100 Hot Song cu “Blinding Lights” y Top R&B Album cu “After Hours”.

“Mi kier tuma e oportunidad aki, pa duna danki na mi mayornan. Mi ta persona cu mi ta awe, danki na e criansa cu nan a duna mi, y un danki hopi grandi na tur e personanan cu ta apoya mi musica, mi ta balora e premionan aki hopi.”

The Billboard Awards tambe tabatin presentacionnan duna pa un variedad grandi di artistanan, cu a colabora un cu otro pa prome biaha, manera Dj Khaled, H.E.R y Migos, ken tin estilo nan di musica hopi diferente, mas sinembargo a trece un ambiente di concierto despues cu e pandemia a cera tur posibilidadnan di concierto. Tambe tabatin Doja Cat y SZA, cu a duna un presentacion futuristico. Alicia Keys, ken Michelle Obama a presenta, a celebra su 20 aña como artista, dunando un presentacion unda cu el a canta su prome hit “Songs In A Minor” y otro di su hitnan durante su carera como artista.

Otro artistanan manera Taylor Swift, Lady Gaga, Kanye West, tambe a gana premionan na e show, aunke nan no tabata presente.