(AP) – Drake Bell, ken anteriormente tabata un di e personahenan principal di e programa popular “Drake & Josh”, a declara su mes culpabel den cargonan relaciona cu un mucha muhe.
Jared “Drake” Bell, di 34 aña di edad, biba na West Hollywood, California, a declara su mes culpabel durante un yamada riba e aplicacion Zoom, den cargonan di a pone un mucha, cu Drake a conoce online despues cu e mucha a atende un di su conciertonan den Cleveland den aña 2017 ora cu e mucha muhe tabatin 15 aña di edad, den peliger y e delito di plama cosnan dañino pa mucha. E huicio di sentencia ta poni pa dia 12 di juli den Cleveland.
Drake Bell, a cuminsa su carera como actor ora cu e tabata mucha, pero a logra un exitoso inmenso danki na su personahenan tempo e tabata un hoben den shownan di Nickelodeon, specificamente “The Amanda Show” y despues “Drake and Josh”, cual a lansa riba e canal den januari di aña 2004. E ultimo episodio di e programa a lansa den september di aña 2007. Bell y su compañero Josh Peck tambe a lansa 2 pelicula di e serie “Drake & Josh”.
Abogado di defensa Ian Friedman a bisa diaranson cu e no lo duna comentario tocante e caso pero a bisa cu lo ser revela durante e huicio di sentencia “dicon e meneer Bell a dicidi di declara su mes culpabel.”
Inicialmente Drake Bell a declara su mes inocente pa cu e cargonan na comienso di e luna aki. Tyler Sinclair, un di e voceronan di Cuyahoga County Prosecutor’s Office, a bisa den e tempo cu inicialmente e mucha a contacta oficina di polis den Toronto na october 2018. Autoridadnan di Toronto a procede na contacta polis di Cleveland, cual a causa un investigacion.
E delito di intento di pone mucha den peliger ta relaciona cu e concierto, Sinclair a declara, unda cu Bell a “viola su responsabilidad di cuido” y a crea un riesgo di daño pa cu e victima. Sinclair no a duna mas detaye tocante cual e riesgo tabata.
Bell y e mucha muhe aki a “desaroya un relacion online” algun aña prome cu e concierto, Sinclair a declara. E plamamento di cosnan dañino pa e mucha ta bin di “mensahenan cu Drake Bell a manda e mucha muhe aki pa medio di rednan social”.
E sentencia ta premira di por ta probacion of 2 aña den prizon. E mucha muhe, ken actualmente ta un adulto, lo tin e oportunidad di duna un declaracion di impacto como victima durante e sentencia.
