Durante ultimo conferencia di prensa di Gobierno di Aruba y Crisis Team, Dr. Yuri Caceres tambe tabata presente pa trece dilanti con situacion di hospital Dr. Horacio Oduber ta na e momentonan aki relaciona cu e aumento di casonan di Covid-19.

Dr. Caceres a splica cu e situacion na momentonan aki na hospital ta bao di control. Te ayera tabatin 2 caso di Covid-19 den area di cuido intensivo, segun loke rapport diario di DVG a indica ayera, aparte di otro pashentnan cu tambe ta den area aki pa otro motibo di salud.

Nan capacidad di cuido intensivo segun loke Caceres a menciona ta suficiente y un di e retonan cu nan tin cu enfrenta tin di haci cu personal, ya cu algun di nan a sali positivo pa Covid-19, loke ta nifica cu nan no por yuda na e momentonan aki.

Di igual forma, Dr. Caceres a indica cu aunke Omicron ta mustra cu e no ta un variante igual di peligroso cu Delta, nan ta anticipa cu e cantidad di pashent den cuido intensivo ta bay aumenta y nan lo mester ta prepara pa esey.

Dr. Caceres tambe a declara cu hospital tin otro reto, na unda nan tin personal cu ta positivo y cu tambe nan tin un tiki menos cama, y door di esaki nan a tuma precaucion. Nan ta bisa cu si hospital mester yena nan por manda pashentnan den exterior. Mayoria di pashent lo wordo manda pa Colombia, na unda nan a yega na un acuerdo cu por manda no solamente pashentnan di cuido intensivo, sino tambe otro pashentnan cu ta sufri di otro tipo di malesa, pa asina nan por crea capacidad pa e pashentnan cu ta drenta via emergencia cu Covid-19 of otro malesa.

El a aclaria cu no tur hende cu ta drenta na hospital mester bay Colombia pa motibo cu na Aruba nan por maneha e situacion di algun pashent. Pero igualmente nan lo por bay Colombia pa motibo di capacidad di hospital. Na e momentonan aki esey no ta asina, pero nan mester ta prepara si e situacion asina lo yega.

Variante Delta tabatin mas o menos 6% di e pashentnan cu a drenta den hospital cu tabata positivo pa Covid-19. Pa loke ta trata Omicrom nan ta espera un 40 pa 45% menos di esey, esey ta nifica cu nan ta espera cu riba e piso general cu entre 2 pa 3% di pashentnan positivo lo yega na e area aki y 1% lo yega na cuido intensivo.

Tocante e cifranan di ayera, cu tabatin 2.769 caso activo, nan ta espera cu un cantidad di e personanan aki lo yega na hospital. Dr. Caceres a splica cu un di e motibonan pakico nan no a yega ainda ta pa motibo cu hopi di e pashentnan aworaki cu a test positivo ta entre 18 pa 45 aña di edad, na unda nan no ta haya e Omicron di manera fuerte cu mester wordo hospitalisa. Na momento cu e grupo di hende mas grandi ta hayel’e nan si ta espera cu un grupo lo yega na hospital.

Dr. Caceres a comenta cu variante Omicron ta mas contagioso y cu ta penetra mas den parti respiratorio como nanishi y garganta, caminda cu Delta tabata afecta mas e area di pulmonnan. El a indica cu un di e cosnan cu por evita contagio ta pa personanan limita contacto cu otro hende y bisti tapaboca. Tur e medidanan cu CrisisTeam a tuma lo bay yuda den esey, pero comunidad tambe tin cu yuda su mes door di limita contacto, vooral den dianan aki di Fin di Aña. Dr. Caceres a menciona cu pa otro siman nan lo por tin un analisis mas precies con Omicron na Aruba lo bay comporta su mes mirando cu cantidad di caso ta aumentando.

Te ainda no tin suficiente informacion di e variante aki. Expertonan local ta haciendo nan estudionan pa haya sa con Omicron ta comporta, y ta indica cu esaki aworaki ta e variante dominante na Aruba, loke ta nifica cu Delta lo bira menos. Si Omicron continua asina, e porcentahe di casonan por yega hopi halto.

Dr. Caceres a informa cu comunidad mester ta un tiki mas cauteloso y tene cuenta cu cuido intensivo ta pa tur hende, por ehemplo pa esnan cu ta sufri accidente di auto na unda cu nan tambe mester yega na hospital. Ta p’esey cu mester ta cauteloso pa no bebe alcohol mientras ta core auto y corda riba otro hende cu tambe mester di cuido na Aruba.

Na Aruba segun rapport diario di Departamento di Salud Publico (DVG), te ayera 30 di december a registra 692 caso nobo di Covid-19 di e cual 85 no ta residente. E cifranan aki ta representa un tasa di positividad entre residentenan di 59%.

E cantidad di casonan activo di Covid-19 pa awe ta 2769 y cantidad di fayecidonan relaciona cu Covid-19 ta 181.

Datonan ta ilustra casonan nobo di Covid-19 cu un averahe semanal di 365 caso pa dia y un averahe di tasa di positividad semanal di 47% pa dia.

Na nivel mundial, te ayera 30 di december a registra 286.045.168 caso di Covid-19, cu un cifra di 5.443.688 persona fayecido y 252.996.814 a recupera.

Di loke ta trata e casonan activo na nivel mundial tin 27.604.666.