E lunanan mei, juni, juli y augustus ta tradicionalmente esunnan mas calor di aña cu temperatura cu ta yega 33 grado Celsius of hasta mas y e risiconan pa haya “heatstroke” (golpi di calor) ta aumenta considerablemente. Dr. Wilmer Salazar di Departamento di Salud Publico a subraya cu medidanan di prevencion ta sumamente necesario, particularmente pa personanan 60+, muchanan bao di 2 aña, personanan cu tin cierto enfermedadnan cronico y pa esunnan cu ta traha den solo henter dia.
Temperatura mas halto ta keda registra rond mundo pa via di “global warming” y naturalmente na paisnan tropical manera Aruba e efecto y consecuencianan ta considerabel. Ola di calor ta un fenomeno cu ta presenta cada tanto tempo. E temperatura ta subi cu algun grado y ta keda extra calor usualmente pa un periodo di entre tres pa cinco dia, pero e ola di calor por extende tambe pa mas dia.
E oranan mas calor, esta di 11or di mainta pa 3’or di atardi, ta oranan crucial pa tur hende tene cuenta cu nan pa evita un golpi di calor, sinembargo realidad ta cu henter dia ta mas calor cu normal ora tin un temporada di temperatura ambiental halto. Anto recomendacion ta cu mester tuma e medidanan di precaucion.
Dr. Salazar ta splica cu na Aruba e efectonan di e temperatura mas halto kisas no ta wordo sinti asina lihe pa via cu tin un biento fuerte constante. Pues, nos no ta sinti e calor di solo, aunke e tin efecto riba nos curpa y por tin consecuencianan pa nos estado di salud. E ta subraya pa dedica extra atencion na personanan di risico halto, incluyendo personanan 60+, muchanan bao di dos aña y esunnan cu tin un enfermedad cronico manera diabetes, problema di curason, presion halto, problema di pulmon, cancer etc.
E grupo di risico mas halto ta e personanan cu no por expresa optimalmente loke nan ta sinti, manera muchanan bao di dos aña y entre otro muchanan cu ta hunga y ta asina distrai cu nan mes en realidad no ta ripara cu nan ta demasiado largo den solo of sin a tuma algo di bebe. Hopi persona no ta sinti ora nan ta deshidrata y p’esey mes semper mester pone extra atencion durante henter dia riba e consumo di suficiente awa y juicenan natural, pues bebidanan sin (mucho) sucu.
Dr. Salazar ta subraya cu un golpi di calor por conduci na e complicacionnan cu ta rekeri hospitalisacion, y hasta por resulta mortal. E sintomanan cu por indica cu tin algo hopi robes ta: e persona ta sinti hopi calor, su temperatura di curpa ta subi, e ta sinti instabil – su cabes ta draai, e por cay flauw, ta deshidrata, por sinti cram y ta sinti su mes debil. E sintomanan por dura 10 pa 15 minuut, pero tambe mas largo; hecho ta cu e persona na e punto aki ta rekeri atencion medico mesora!
Pa preveni un golpi di calor, por tuma diferente precaucion. Dr. Salazar ta pone hopi enfasis riba e consumo di likido, esta awa y/of juicenan natural sin sucu agrega; pa no bay den solo entre 11or di mainta y 3or di atardi ta mas tanto posibel den airco, of si no tin airco
mantene e cas bon ventila y uza fan pa circulacion di aire, pasobra espacio cera sin airco ta causa un concentracion di calor y humedad cu ta afecta e curpa den forma negativo.
Dr. Salazar ta conseha tambe pa pone extra atencion na muchanan chikito y baby, pa iritacion den e cocodek, den e area di pamper, den e area di nan nek y tambe check nan bon si nan ta yora, como cu nan por tin sed, ademas di hopi calor. Personanan cu tin obesidad tambe mester ta mas atento e dianan aki pa preveni cualkier complicacion y iritacion di cuero.
DESPA ta pidi pa scolnan tin disponibilidad di awa henter dia pa e muchanan y pa no laga nan hunga largo den solo, pasobra e muchanan mes no ta ripara cu nan ta deshidrata y e sintomanan lo por presenta despues. Bisti paña cu ta los na curpa, di color cla y lihe, traha di material natural manera catuna pa e paña soda no pega riba curpa. Evita bisti paña color preto of scur of traha di material sintetico. Ora sali for di cas, semper hiba un boter di awa pa bebe pa evita deshidratacion y corda tuma un of mas break pa bebe durante cu ta haci ehercicio of deporte.
Bay diripiente di un espacio friu, unda tin airco, pa pafo unda ta hopi calor tambe por afecta e curpa como cu e adernan ta dilata. Esaki por tin como consecuencia cu e persona por cay flauw. Dr. Salazar ta urgi pa e luganan unda cu ta cuida mucha y hende grandi, manera casnan di cuido unda cu ta provee servicio di dia of residencia, pa pone bon atencion riba e tipnan di prevencion y ademas pa no sirbi hende grandi mucho coy bebe cu ta contene cafeina e dianan aki. Tipnan pa mantene muchanan chikito/baby fresco ta pa simplemente duna nan mas biaha un baño durante di dia.
