Dr. Wilmer Salazar: ‘Persona asintomatico cu coronavirus por keda positivo 30 dia despues’

Dr. Wilmer Salazar, microbiologo y consehero medico di Departamento di Salubridad Publico (DVG), durante un conferencia di prensa a splica e motibonan pakico nan a tuma e decision di no re-test un persona pa Covid-19.

Manera el a menciona, Covid-19 ta un malesa ‘auto-limita’, e tempo maximo ta di 14 dia pa un persona cu tin sintomanan leve. Esey lo por keda te cuatro cu seis siman cu sintomanan, cu por yega te hasta un nivel di gravedad.

Esaki ta un punto di salida, segun el a sigura, pa motibo cu tin cu corda cu mayoria di hende cu ta sufri di Covi-19 tin poco sintomanan. “Casi 90% di hende cu a wordo infecta cu Covid-19 tin sintomanan leve.” Y den tempo aki durante e fase di presentacion di sintomanan tin un carga viral hopi halto, loke ta nifica “cu e virus ta libera un cantidad di particula infeccioso y contagioso cu e lo por plama pa otro.” Pero despues di esey, su carga viral ta baha te un minimo cu a wordo considera como un fase menor di riesgo.

Salazar a bisa cu e parti clinico ta hopi importante ora un persona tin Covid-19 cu sintomanan leve. E test ta un herment cu ta confirma via laboratorio si ta Covid-19. Ta warda e tempo pa tur sintoma di e persona desaparece, y despues di esey e persona por sigui sin ningun problema di transmision.

Tambe el a trece dilanti cu tin estudionan, incluyendo un modelo matematico, cu ta bisa cu e virus lo por dura te cu 12.5 dia den cuerpo humano y ta inclui e ultimo parti cu no ta infeccioso. Loke ta pasa ta cu no ta un virus so, ta miyones cu ta wordo replica den e celnan respiratorio y pa por haci un limpiesa, mester di tempo.

“Esey ta bida di e virus cu ta keda eynan, cu no ta infeccioso, pero ta tarda hopi” Salazar a sigura.

PCR test tin e caracteristica cu ta hopi sensitivo y cu hopi diagnostico, loke ta nifica cu ta detecta e virus maske no ta infeccioso pa un tempo largo. Y estudio a señala cu e bida di e virus cu no ta infeccioso por keda den e curpa humano te hasta 30 dia, kiermen cu un persona cu a haya e virus y no a presenta sintomanan, 30 dia despues e por keda positivo. Pero esey no ta nifica cu e persona ta infeccioso, sino cu el a pasa su fase y ainda e resto di e virus ta keda y e curpa mester sigui traha.