Dr. Wilmer Salazar: ‘Mondmask medico no ta efectivo pasobra e virus por drenta den dje’

Dr. Wilmer Salazar, microbiologo y consehero medico di DVG, a splica ki tipo di mondmask ta miho pa evita un contagio cu COVID-19 y cual ta esun mas efectivo pa otro persona evita e contagio.

Den e conferencia di prensa, Salazar a mustra como ehempel un mondmask cu nan ta yama ‘medical’ cu ta esun cu tin cierto specificacion na unda ta bisa cu e ta sirbi pa proteha personanan cu ta haci uso di dje pa evita cu gotanan por cay y por bay otro caminda.

Di esaki, el a duna como ehemplo cu e dokternan den un sala di operacion ta haci uso di dje pa ora e ta opera ta evita saca bacteria di su boca cu por infecta e herida.

Tambe, el a mustra otro mondmask cu ta special, fabrica cu fibra special cu no ta laga drenta gotanan ni particulanan bou di 5 micra, cu ta contene den cierto virus como COVID-19. El a señala cu esaki ta esun di mas efectivo di e dos mondmask cu el a mustra, pa motibo cu den un 95% e ta retene particula sea di afo of paden; mientras cu e otro mondmask medico no tin ningun efecto riba dje.

“E mondmask medico no ta efectivo pasobra e virus por drenta den e mondmask ey”, Salazar a sigura.

E mondmask special cu manera e mes a expresa ta proteha den un 95%, mester cumpli cu algun specificacion internacional di calidad. Nan ta wordo comproba cu e particulanan como esun di un persona cu tuberculosis of otro tipo di virus como COVID-19 ta keda reteni y e persona ta proteha asina.

Asina mes, el a conta cu el a mira riba caya e hendenan cu ta usa mondmask di tela, pero e ora ey e personanan tambe ta haci uso di telefon, ta papia riba dje y ta contamina.

El a declara cu no tin ningun restriccion pa usa e mondmask aki, pero e persona mester cumpli cu cuatro norma:

• Si e persona no mester sali for di su cas, no sali.
• Mantene distancia social, mantene un distancia di dos meter cu otro persona cu por tin sintomanan.
• Laba man frecuentemente.
• No pasa dedenan riba wowo, boca of nanishi. Despues di kita e mondmask mester tira esey afo.

Salazar a specifica cu tambe ta existi hende cu ta usa e mesun mondmask te cu un siman y esey ta un peliger pa e persona mes, su famia y esun cu ta banda di dje.