Dr. Wilmer Salazar, miembro di Management Team di Salubridad Publico tambe tabata presente durante e reunion presidi pa Prome Minister Mike Eman riba e campaña nacional cu ta bay cuminsa pa evita criaderonan cu ta trece e sangura cu ta causa e virus Zika.
Aruba no tin ningun caso detecta, pero esey no ta nifica cu mester sinta keto, Prome Minister Eman a bisa na salida di e reunion den compania di representantenan di Salubridad Publico, SERLIMAR, City Inspector, GKMB y DOW.
Dr. Salazar di su banda a splica cu e motibo di e reunion tabata pa sinta hunto cu tur instancia y traha hunto pa combati, controla y monitorea e sangura cauante di malesanan manera Dengue, Chininguya y Zika. “E lo bay ta un trabou conhunto, unda Prome Minister hunto cu Ministernan di Salubridad y Infrastructura a yama tur instancia cu tin di haber cu combatimento di e sangura, limpiesa y maneho riba areanan di medio ambiente pa mantene Aruba limpi di criaderonan.”
E problema di e virus Zika ta uno basta grandi na diferente paisnan di Latino America manera Brazil, Colombia, Venezuela, Surnam y otronan.
Pa cuminsa ta inicia un campaña nacional di conscientisacion via medionan di comunicacion. Via di e campaña lo conscientisa e ciudadanonan cu tur hende na un cas cu criadero ta den peliger y hasta bisiñanan. Pesey ta conseha e hendenan pa simplemente tur dia pasa rond di cas, na scol, misa of negoshinan y tira un bista. “Nos tur hunto por keda liber di e peliger cu ta causa transmision di e malesa via sangura.” Ta pone enfasis pa conscientisa ciudadanonan pa controla den nan cura pa obhetonan cu por causa criaderonan di sangura. Tambe SERLIMAR, GKMB y DOW lo traha hunto den bishita di barionan, pa mantene areanan limpi di criaderonan.
