Vacunacion di muchanan entre 5 pa 11 aña di edad contra Covid-19 ta un topico cu ta generando polemica entre algun sector di comunidad na unda expertonan den area di salud a comparti informacion cu Bon Dia Aruba pa trece mas informacion tocante e topico aki.

Manera ta conoci, awe diasabra y mañan diadomingo na Centro Libertador Betico Croes na Santa Cruz tin un otro Vacunathon cu seccion Cuido Salud Hubenil y Stichting Wit Gele Kruis Aruba a organisa specialmente pa muchanan entre 5 pa 11 aña contra Covid-19 for di 9or di mainta te cu 4or di atardi.

Pa cu esaki, Bon Dia Aruba a tuma contacto cu Dr. Maritza Ordoñez y Wilmer Salazar di Departamento di Salud Publico (DVG) pa asina ey nan por duna un splicacion mas amplio tocante pakico vacunacion pa muchanan contra Covid-19 ta importante, aunke algun datonan ta mustra cu nan ta e grupo cu ta presenta sintomanan mas leve.

Salazar a comenta cu Covid-19 no ta un malesa infeccioso suave sino cu ta algo peligroso cu a crea hopi problema den salud no solamente den hende adulto pero tambe den hende hoben y cada dia mas ta bin dilanti cu muchanan tambe ta wordo afecta y cu tambe ta presenta sintomanan.

Ora muchanan y adolescentenan ta vacuna nan ta wordo protegi di Covid-19 y ta evita transmision di e virus pa otro grupo di hende, incluyendo su famia, amigonan di scol y hende cu su condicion di salud por bira pio unda cu hasta por yega na hospitalisacion.

“Muchanan cu no ta wordo vacuna ta core mas riesgo halto di infeccion pa coronavirus”, Salazar a sigura.

E virus aki no ta mescos cu un grip normal, el a declara cu ta algo multisistemico cu ta afecta no solamente nanishi, garganta, bronkio, pulmon, cu tambe por afecta otro parti di organonan como celebro, curason, higra y ta p’esey cu ta importante e vacunacion “pasobra bo ta protehando un mucha cu lo por tin cierto condicion unda cu e virus lo por bira asina grandi cu lo por crea un problema di salud”, el a enfatisa.

Si mayoria di muchanan di e comunidad ta wordo vacuna, e ta proteha su grupo di scol, como maestronan, amigonan, famia y personanan rond di dje pa evita cu esunnan cu lo por tin un complicacion por bira mas malo.

“Mayornan mester ta bon informa cu e vacuna no solamente ta yuda un mucha chikito, tambe ta proteha tur e comunidad” ademas, e tambe por duna proteccion na un malesa mas grave segun loke Salazar a indica a pesar cu mayoria di casonan di muchanan ta leve, “pero nos no sa nunca ki dia nos por haya un golpi grandi”.

Temporada di grip tambe ta traha un situacion ideal pa coronavirus lo por crece y crea problemanan manera Salazar a menciona, caminda cu tambe tin muchanan cu ta sufri di asma, tosamento, kentura, dificultad pa hala rosea cu ta yega na hospital pa haya cuido medico.

“E virus por traha asina lihe cu e por yega na garganta y pasa pa pulmon loke por ocasiona un infeccion cu ta yama ‘Multisystem Inflammatory Syndrome Children (MIS-C)”, el a manifesta.

Ademas Salazar a informa cu nan ta duna charla na sector hotelero, industrial, entre otro unda cu nan ta splica cu “esaki no ta un vacuna experimental manera algun hende ta bisa, CDC y FDA di Merca a aproba e vacunanan aki, nan ta haci un trabou di investigacion riguroso pa por duna un garantia di siguridad di e normanan cu nan tin, esaki no ta experimental, esey ta un excuus pa bisa mi no kier vacuna, pero esey no ta motibo, pakico tin temor?”

Si un mucha ta wordo infecta cu Covid-19 pero e sintomanan ta hopi leve, e lo por haya sintomanan cu expertonan di salud ta yam’e ‘Efecto Post Covid’ e mucha por sinti hopi cansancio, por haya dolor di cabes, problema pa drumi, dificultad di concentracion y esaki por ta e efectonan cu por keda pa un largo plaso cu por causa consecuencianan pa e mucha, pa motibo cu e virus ta drenta den e celulanan y e por crea dañonan den dje ademas di efectonan di inflamacion.

“Nos ta un poblacion di 120.000 habitante aproximadamente, un parti grandi ta muchanan y si un di nan ta bay na intensive care y ta muri, ta hopi dolor pa nos”, Salazar a declara.

Loke a sucede na Europa, Merca y otro paisnan di Latino America cu e MIS-C den muchanan ta algo pa reflexiona y cu por yega na Aruba tambe, pa loke Salazar a pidi comunidad pa tuma tur e medidanan di precaucion “pasobra e miedo ta pa motibo di mal informacion”.

Muchanan cu ta sufri di asma of alergia tambe por haya e vacuna manera el a sigura, ora un mucha tin un condicion cu ta yama un alergia severo ta pa un componente cu e vacuna tin y e vacuna ta yud’e, Salazar a splica cu e virus ta drenta den e parti di hala rosea y esey por yega na su pulmon loke por causa e problema mas grave cu e mucha por tin.

Den mundo medico tin basta splicacion kico por sucede ora un mucha ta haya un condicion di infeccion di virus respiratorio y coronavirus no tin e mesun efecto cu otro virusnan, e ta afecta tur caminda.

Asina mes, el a informa cu muchanan di 5 pa 11 aña solamente ta haya un vacuna so y no tres manera adulto ta hayando na e momentonan aki, expertonan di salud a bisa cu nan no tin evidencia unda cu ta indica cu muchanan entre 5 pa 11 aña lo mester mas cu un dosis of un booster.

Vacuna pa muchanan y vacuna pa hende adulto ta igual y ta di Pfizer tambe, unico cos cu ta cambia ta cu pa mucha e dosis ta menos, pa adulto e dosis ta di 0.3 milliliter y pa mucha ta di 0.1 milliliter.

Efectonan secundario cu nan por haya ta igual cu esun cu personanan adulto ta haya, un tiki di dolor den e brasa unda a pone e vacuna, por haya kentura, loke tambe ta pasa ora muchanan chikito ta haya un otro tipo di vacuna.

Pa finalisa, Salazar a expresa cu mayornan por mira con Covid-19 a afecta e salud na henter mundo y cu ni un persona ta scapa di dje y tin cu protege e muchanan tur loke por, pa mayornan por keda convenci tambe por mira cu na Europa tambe ta poniendo vacuna pa muchanan entre 5 pa 11 aña for di aña pasa.