Departamento di Salud Publico ta haci un recordatorio na tur esunnan cu ta bayendo e Weganan Olimpico na Rio di Janeiro, na Brazil pa nan pasa y tuma e vacuna pa preveni cualkier tipo di enfermedad. Algun vacuna ta obligatorio y ta importante pa tene e defensanan halto ora di biaha. Dr. Wilmer Salazar di DESPA a duna di conoce cu ta conoci cu Brazil for di aña 2015 ta pasando riba cierto situacionnan di enfermedadnan transmiti pa diferente vector, tambe mediante di awa, cuminda, etc.
Ta recomenda e delegacion olimpico pa tene na cuenta cierto tipnan y specialmente e parti di vacunanan como e indicacionnan pa proteha nan mes pa evita di adkiri algun tipo di enfermedad cu nan lo por haya y trece Aruba, segun Dr. Salazar. Un di e vacunanan cu nan mester tin y cu ta obligatorio pa por drenta como turista na Brazil ta esun di “Yellow Fever” e vacuna aki ta obtenibel na Seccion di Malesanan Contagioso, DBZ. Aedes aegypti e sangura pata blanco y preto cu tambe ta e vector di “Yellow Fever” ta e vector tambe di Dengue, Chickunguya y Zika. Proteccion contra di pica di sangura ta un prioridad.
No ta solamente e delegacion deportivo pero tambe e famianan of otro personanan cu ta bayendo Brazil mester ta vacuna . Ademas mester bisa cu tin casonan di Cacheton y Sarampi na Brazil y cu ora cu tin di aglomeracion di hende haya un infeccion via aire of contacto directo ta bay masha facil.
Departamento di Salud Publico ta sigui e recomendacionnan di Organisacion Mundial di Salud (WHO/OMS) pa aplica e vacuna di MMR cu ta Measles, Mumps y Rubela (Cacheton, Sarampi y Rubela) cu tambe na Brazil tin’e y nos mester ta vacuna pa tin e proteccion.
Personanan mayor di 20 aña mester tuma contacto cu DESPA su Seccion di malesanan Contagioso pa haya e vacuna aki. Hobennan bao di 19 aña, si tin un skema di vacunacion caba mester check cu Seccion di Cuido Hubenil (Jeugd Gezondheidzorg) pa check si e vacunanan ta completo. E parti tambe di DPT (Difteria, Tetano y Polio) tambe ta recomendabel pa aplica pa personanan mayor di 20 aña di edad. Esey ta pa garantisa cu e persona su sistema immuun ta fuerte. E ora e posibilidad di adkiri e maleza ta minimo o inexistente, e experto a indica.
E dokter a recomenda pa hende muhe cu tin posibilidad pa sali na estado of ta na estado pa tuma contacto cu Seccion di Malesanan Contagioso pa por haya recomendacion riba esey. Lo tin e chens cu mester tuma e vacuna di MMR.
Tambe ta valido e aspecto di contacto sexual. Zika na Brazil ya caba ta endemico y tin hopi caso. Mayoria di e enfermedadnan aki ta sintomatico den un 80%. Si bo tin algun sintoma mester raporta na e sistema di salud na Brazil y mesora na Aruba, Dr. Wilmer Salazar a duna di conoce.
E aña aki a aplica 21 vacuna contra “Yellow Fever”. Esaki tabata personanan envolvi cu e weganan olimpico. E periodo recomendabel pa tuma e vacuna ta 10 dia prome cu biaha pa bo por haya un sistema immuun basta fuerte.
E condicionnan di awa na Brazil tampoco ta mucho bon y ta recomenda pa uza boter di awa cu ta garantisa un stempel di calidad y pa por evita adkiri algun tipo di enfermedad transmiti pa cuminda. Higiena ta hopi importante. Prevencion ta indispensabel.
