E criterionan pa saca un hende for di isolacion, sin mester haci test di nobo, a produci hopi comentario y reaccion.

Ta asina cu dia 12 di augustus ultimo, departamento di Salubridad Publico (DVG) a informa riba cambio den maneho pa cu cuarentena. Nan ta cambionan cu -segun DVG- gradualmente e casonan ta subi, gradualmente tambe nan ta bay ta ahusta y trece cambio na cierto maneho.

Pa loke ta e maneho di esnan den cuarentena, DVG a yega di informa entre otro cu tur persona cu ta biba den un cas cu un persona positivo pa Covid-19 ta bay automaticamente den cuarentena. E pareha di e persona positivo cu no ta biba na mesun adres tambe ta bay den cuarentena. Tur ta bay den cuarentena obligatorio pa 7 dia, sigui pa 7 dia recomenda. E dianan obligatorio (7) ta wordo cubri pa SVB.

Si denter di e prome 7 dianan presenta sintoma mester ta tuma contacto cu dokter di cas pa test. Si despues di 7 dia no presenta sintoma e persona por bay traha cu tur medida di proteccion, pero DVG ta recomenda tuma 7 dia di vakantie, y sigui monitor bo salud na cas y na prome indicacion di sintoma mester consulta cu dokter di cas.

Cu otro palabra, si bo ta biba den un cas cu un persona positivo, no warda te ora cu DVG yama bo. Pa medio di esaki bo ta informa cu bo mester bay den cuarentena obligatorio 7 dia. E personanan cu ta biba cu un caso positivo, DVG ta señala nan y ta informa SVb di nan.

Familiar, amistadnan cu no ta biba den e cas pero cu a papia of encontra cu e persona positivo, no ta bay den cuarentena. Pero mester monitor nan salud pa sintoma, sigui tur instruccion di proteccion y si nan desaroya sintoma yama dokter di cas.

Asintomatico

Dr. Wilmer Salazar di DVG, hunto cu otro expertonan, a traha riba e criteria aki a base di recomendacion di RIVM y Organisacion Mundial di Salud (WHO).

Dr. Salazar a splica cu den caso un persona ta asintomatico y el a test Covid positivo, logicamente e persona aki a resulta infecta cu e virus. Esaki aunke e no ta mustra sintomanan of manifestacion clinico.

Den e caso aki bo ta laga un tempo, minimo un siman of 10 dia, esaki ta depende di cada persona pa wak si e persona ta presenta sintomanan of no.

Si e persona no ta presenta sintomanan, esaki kiermen cu su fase di recuperacion a bay bon. Ademas e posibilidad di transmision of contagio di e virus ta low risk. Kiermen e ta hopi abao y e persona no tin suficiente cantidad di e virus den su sistema. E ta mas tanto den su garganta of no tin sintomanan mes. Pues e ta un persona asintomatico totalmente, y e persona aki su capacidad pa transmiti e virus ta hopi abao. P’esey tin criteria pa maneha cune.

Sinembargo e realidad ta mustra cu un persona cu ta den un situacion asina ta call SVb pa AO. Pero den caso asina nan ta sugeri pa e persona por tuma contacto cu DVG prome pa pidi haci re test pa check, si ainda e ta positivo of no, despues di e periodo cu e virus supuestamente mester manifesta su mes.

Dr. Salazar a aclaria cu e shete (7) dia ta conta pa e persona cu ta Covid positivo, pero sin sintomanan. Pasobra durante e tempo ey, bo lo por desaroya sintomanan. Ora nan ta detecta Covid den bo sistema, e ta den un periodo infeccioso. P’esey mester warda un tempo pa wak si bo ta manifesta sintomanan.

El a reitera cu un persona asintomatico ta un low risk, ya cu e no tin sintomanan. P’esey e criterio ta pa warda un siman, y despues di dje mester wak si e ta presenta sintomanan of no.

El a laga sa cu unabes e tempo aki a wordo cumpli, bo ta hiba bo bida, teniendo cuenta cu proteccion, uzando face mask, distanciamento social, no bay den aglomeracion of multitud, labamento regular di man, y tur reglanan di higiena exigi pa atende cu Covid. E persona por bay traha manteniendo strictamente tur e medidanan higienico manera debe ser.

Ayera nochi, minister di Salubridad Publico, Dangui Oduber a bisa cu e criteria aki a wordo adopta teniendo cuenta cu di RIVM y Organisacion Mundial di Salud (WHO) su criterianan. Igualmente el a laga sa cu nan lo mantene e maneho aki ya cu te aworaki no tin motibo pa cambia e criteria aki cu ta totalmente otro na esunnan cu inicialmente nos a bin cune na luna di maart ultimo. El a bisa cu for di e luna ey te aworaki, hopi cos mundo cientifico a conoce di e virus Covid-19. P’esey cierto criterianan a wordo cambia of adapta.