Den un conferencia di prensa, Dr. Wilmer Salazar di Departamento di Salud Publico (DVG) a trece dilanti un actualisacion pa loke ta trata e variantenan cu comunidad mester tene cuenta cune.
El a splica cu e definicion di un variante ta e ora cu un virus ta cambia, su structura genetico a transforma y e por bira pa bon of malo.
E parti bon ta ora e ta perde e capacidad di infecta of di causa daño. E ta bira malo ora e ta tuma tur e material genetico pa por hacie mas contagioso of por causa mas virulencia.
Salazar a bisa cu e variante ta un linea genetico, loke ta nifica cu un virus di coronavirus por haci mutacion of cambia su structura y e ta keda cu su mesun material genetico; esey ta wordo denomina variante.
Esun cu aworaki ta predomina ta e variante Ingles of Britanico, cu tin un caracteristica special, esta, “ta hopi contagioso” . Y ta crea mas situacion di complicacion, ora un persona cu tin cierto malesanan adicional lo ta hay’e por causa su hospitalisacion incluyendo su fayecimento.
E variante aki a keda identifica pa prome biaha na Inglatera, y despues el a plama asina lihe na Europa, Merca, Sur America y region di Caribe. Actualmente Aruba a conoce 5 variante como esun aki di Inglatera, esun Mexicano cu ta un otro tipo di e virus Covid-19, di California cu segun Salazar no ta mucho contagioso ainda y cu ta den estudio; e variante Brasileño y e variante di New York.
Na Aruba e mayor cantidad di muestranan cu a wordo detecta ta di e variante di Inglatera cu aproximadamente 50 muestra mientras cu di e otronan e cantidad ta hopi mas abou, di Brasil tin 1, igualmente cu esun di New York, di Mexico tin 6 y di California tin 4. Esaki ta nifica cu comunidad mester tin mas precaucion y cuidou pa atende cu e variante Britanico aki.
