Coronavirus ta un malesa cu a afecta henter mundo tanto den area di salud,como social, economico ydeportivo, entre otro. Pa loke ta trata deporte, na medida cu e crisis di e pandemia aki ta pasa, hende por haci actividad deportivo di un manera progresivo y menos duro, pa evita cu e persona lo haya problema.

Asina a duna di conoce Ricardo Vargas, dokter specialista den Medicina Deportivo. Tambe el a specifica cu un persona por haci cierto actividadnan deportivo, pero mester cierto rekisito, esta cu e persona mester haci actividad fisico modera, pa motibo cu un actividad fisico intenso por pone stress riba e curpa, loke por causa debilidad den sistema inmunologico.

Te awor ta importante pa e mantencion di e sistema inmunologico pa enfrenta tur e cos cu a bin, por ehemplo, Covid-19. Den caso aki tin hopi medida cu mester tuma di distanciamento social, pero e barera fundamental ta e sistema inmunologico di cada persona y e actividad fisico sigur por yuda pa defende cada ken di e virus.

Vargas a specifica cu tin un diferencia entre haci actividad un tiki so, pero esey no ta haci nada riba e curpa. Tambe tin esunnan cu ta practica hopi duro, pero esey tambe ta malo, pa motibo cu por haya elevacion di cortisol y diferente enzym, cu por bira dificil pa e curpa por eleva e sistema inmunologico. Al contrario, esaki ta baha e inmunidad, p’esey expertonan ta conseha den periodo aki un actividad fisico modera.

Tocante esaki, Vargas a splica cu hende por haci un actividad fisico aerobico, como canamento cu ta fortifica e sistema inmunologico desde e punto di bista deportivo. Landamento ta otro actividad cu ta bon pa hende por haci, asina como tambe compaña ehercicio cu un bida mas saludabel.

Vargas a comenta cu ta existi hopi hende cu a haya falta di bay gym y entrena duro. Pa deporte di halto rendimento tin un momento na unda e sistema inmunologico di e persona ta baha y por haya grip of algun tipo di malesa. “Si e persona ta entrena hopi duro, e sistema inmunologico ta baha pasobra e curpa tin stress y e celula cytokine, cu ta protege e curpa, ta subi.”

Asina mes, el a sigura cu e parti psicologico ta haya un mehoracion cu actividad fisico, ta haci e persona mas relax. Esaki tambe ta importante, pa motibo cu hende a haya cambio den nan sistema di bida, cambia e forma di traha, incluso den e mesun famia tin cambionan den e normal nobo cu tin cierto caracteristica cu tur hende cu ta haci actividad fisico mester tene na cuenta. No solamente e beneficio riba e curpa, sino cu tambe e psicologico y den entorno familiar, hopi famia den dianan aki a haci ehercicio hunto.

Awor cu e normal nobo, tur luganan na unda ta haci actividad deportivo tin protocol, incluso di cada federacion internacional di deporte cu tin un protocol pa cada deporte. Tambe con e personanan por drenta den un gym, kico tin cu haci pa enfoca riba e salud y distanciamento social.

E mayoria di instalacion deportivo a traha un protocol general y individual, pa motibo cu prome cu Covid-19, den gym tabatin 20 persona aden y awor esey no ta posibel mas. Pero pa landamento ta otro tipo di protocol, por ehemplo.

Di esaki, el a señala cu tin diferente institucion manera Ibisa of Departamento di Salubridad Publico cu ta trahando pa haci bishita den instalacion deportivo pa wak si e personanan ta cumpli cu e protocol y si por sigura cu ta cumpli cu loke nan a pidi.

Vargas ta traha na Fundacion Centro Medico Deportivo Cemedar, na unda el a bisa cu tambe mester implementa un protocol pa tur e atleta y cada luga di e centro tin su reglanan nobo.

Pa finalisa, el a menciona cu ta importante pa personanan por mantene e responsabilidad pa cu e normal nobo; y e practica deportivo ta pone un cambio tambe den e forma di enfrenta un epidemia. Como tambe pa fortifica e curpa y mente, nos tur por haya un salida den e tempo cu ta pasando awor.