Manera a keda conoci aña pasa, departamento di Salubridad Publico (DVG) a pone na disposicion di personanan cu no tin status legal na Aruba un centro di diagnostico pa haci e test pa Covid-19 y a informa cu esey lo keda cera pa algun dia.

Esaki ta pa motibo cu e trahadonan ta bezig cu e campaña di vacunacion y e casonan di coronavirus cu a aumenta den comunidad.

“Esaki no ta nifica cu nan ta keda desampara” a afirma e dokter Maritza Ordoñez, ken ta consehero di departamento di Salud Publico, durante un entrevista. El a afirma cu cualkier persona cu no tin un condicion legal na Aruba y ta presenta e sintomanan por yama na e number 280.0101 pa asina nan por atende nan caso desde 8or di mainta te cu 3or di atardi.

Ordoñez a splica cu e proceso ta consisti di yama e number aki, cu e cual e persona ta haya un codigo y hiba esey na hospital, na unda ta haci e test sin costo, e ta un servicio gratuito.

El a enfatisa cu no ta existi ningun riesgo di deportacion ora nan ta presenta na hospital, pa via di departamento di Polis of Guarda Nos Costa.

Pa loke ta trata e aumento di casonan positivo, a puntra con ta para cu expectativanan pa e aña aki pa loke ta trata e area di salud. Ademas cu ta existi cierto grupo di persona cu te ainda no ta ripara e magnitud di e malesa di Covid-19 y no ta sigui e protocolnan sanitario. Pa cu esaki, Ordoñez a comenta cu e expectativanan ‘preocupante’.

El a sigura cu e brote aki di aumento di casonan a surgi cu e fiestanan di celebracion di Pasco y fin di aña, na unda algun persona no tabata kier sigui e medidanan pa evita e plamamento di e virus.

“Tur esaki ta e resultado. Awor nos ta optimista pa yuda mantene e stabilidad, pero mi ta kere cu ta bin un repunte di casonan den sentido cu ainda ta falta pa haya loke ta trata e reunionnan di e prome dianan di aña”, Ordoñez a sigura. “Si e situacion aki continua cu un repunte di casonan, mi ta kere cu medidanan ta na caminda y ta hopi necesario pa hende cu no kier cambia su comportamento”, el a expresa.

Pa loke ta trata e vacuna cu ta cuminsa yega na Aruba dia 13 di januari, Gobierno di Aruba a anuncia cu nan lo tin disponibel riba mercado tres vacuna di diferente laboratorio como Pfizer, Moderna y AstraZeneca. Nan tin un indicacion caba pa cu esaki y un plan con pa haci’e, pero no tin un plan concreto di ki dia lo haya tur e vacuna pa asina por vacuna di 50% pa 70% di e poblacion.

A keda conoci cu e cantidad cu lo yega primeramente ta di 1.000 dosis y di esaki Ordoñez a menciona cu minister di Salud, Dangui Oduber ta trahando riba e situacion ey, pa asina Aruba por haya mas cantidad. A cuminsa cu e cantidad aki pa motibo cu mester protege esunnan cu ta den e prome linea, como ehemplo, personal medico, enfermero, polis, etc.

“Nos tin cu cuminsa cu nan pa asina duna siguridad na e pueblo cu e vacuna ta sigur y cu lo proteha nos”, el a bisa.

Di mesun manera, a wordo puntra si e cantidad di medidanan cu a wordo implementa pa e dianan aki ta suficiente of mester bira mas drastico pa asina por baha e plamamento di e virus, Ordoñez a contesta cu e no ta kere cu mester tuma un decision asina fuerte, pa motibo cu si lo subi e cantidad di medidanan esey tambe por trece consecuencianan pa e pais den materia economico.

“Si lo cera tur cos bek, ken ta bay traha? Con por produci? Of con lo economia lo cana? Eynan por sinti e consecuencianan, pero tin cu pone algun di nan pasobra e problema ta sigui cu e comportacion di e hende y castiga esunnan cu no kier sigui cu protocolnan di bio-seguridad”

El a trece dilanti cu ta comprendibel cu ta existi hende cu tin miedo di perde nan trabou -manera a sucede cu hopi hende caba- y cu pa via di esey ta preferi di no haci e test, ni bisa cu ta sinti malo pa bay traha loke ta trece mas consecuencia, pa motibo cu ora e virus ta multiplica lo nifica cu por yega na un caos.

Pa finalisa, Ordoñez a haci un invitacion pa personanan cu no tin un status legal na isla, cu ta sinti algun sintomanan y cu tin miedo di perde nan trabou pa yama na e number menciona caba y asina por haci e test pa Covid-19.

Ayera, Aruba a registra un cifra di 94 caso nobo di Covid-19, di cual 84 ta residente y 10 ta no-residente, pa cu esaki, a wordo puntra pa departamento di Salud Publico pa loke ta trata e caso di personanan cu no ta residente na Aruba na cua luga nan ta keda isola, Jurette Croes vocero a duna di conoce cu nan tin departamentonan asigna pa loke tin di haber cu isolacion di personanan cu no ta biba na Aruba, den caso aki turistanan y cu nan no ta keda den hotelnan.