Dr. Martina ta sugeri cu esun cu por abstene di haya yiu…warda un rato

Dr. Byron Martina (PhD) kende ta un eminencia riba tereno di virologia a participa den e conferencia cumbre cu a tuma luga recientemente cu e dunadonan di servicio di salud rond di e topico di Zika, pero tambe di Dengue y Chikungunya, organisa pa AZV.  

Dr. Martina kende ta traha cu Erasmus Medical Center na Utrecht (Hulanda) a trece dilanti diferente investigacion cu ta tumando luga na Hulanda mas tanto riba e genotipo of clasificacion riba e tipo di Chinkungunya cu ta existi.  

E investigado aki a declara cu ainda no a wordo demostra cientificamente cu e virus di Zika ta esun cu a produci e casonan di baby naci cu cabes chikito (microcefalia) na Brasil. Sinembargo ora cu Bon Dia Aruba a puntra si tabata consehabel of responsabel si of no, cu e hende muhe lo abstene di haya yiu, el a conseha pa esun cu por warda un rato, te ora cu e situacion aki lo wordo clarifica debidamente. 

Abstene di haya yiu

Dr. Martina a reconoce cu e pregunta aki tabata hopi dificil. E por papia como cientifico y como un hende cu por duna un conseho. Den e caso aki el a indica cu si un hende no ta sigur di un cos, ta bon pa warda un rato, si e por warda, pasobra tin caso cu nan no por warda.

“Pero si bo por warda, dicon no por warda mas cu ta un aña asina”, segun Dr. Martina.

E ta argumenta cu ta un echo cu aworaki Zika por causa un epidemia, pero despues e ta bay. Pa motibo cu un hende ta resulta infecta un biaha so dor di Zika. Pues despues di e epidemia ta bin resulta cu e problema ta bay tambe, segun e investigado aki.

P’esey e ta conseha entre un of dos aña pa un hende muhe sali na e momento actual considerando e menasa di Zika den nos region. Pero tin circunstancia special cu e hende muhe no por warda tanto tempo, ya cu esaki ta nan ultimo chens pa haya yiu. E ta haya cu no ta responsabel pa bo conseha un pareha pa no haya yiu.

Den un caso asina ta miho pa nan conseha cu si nan kier haya yiu tuma e prevencion necesario pa bo no wordo infecta dor di uza repelente pa no wordo pica pa sangura.

Criterio  

Durante e conferencia aki Dr. Martina a revela cu e genotype ta marca un diferencia tanto den e manifestacion clinico y tambe e reaccion inmunologico di e persona.  El a bisa cu ta existi 11 criterio pa tene na cuenta prome cu nan lo por sigura cu un virus ta esun cu a causa cierto condicion. El a referi na e situacion cu a surgi na Brasil unda varios caso di baby recien  a presenta microcefalia y nan a purba di relaciona esaki cu e brote cu ta existi di Zika na Brasil.

Sinembargo Dr. Martina a laga sa cu ainda no por relaciona un cos cu otro ya cu ainda e investigadonan tin hopi caminda pa cana. Nan mester tin mas evidencia  pa demostra cu e virus di e Zika ta esun cu ta causando microcefalia.