ORANJESTAD – Recientemente servicio di malesanan infeccioso di Departamento di Salud Publico a invita Dr Karen Lewis-Bell sub-regional advisor, inmunisacion di PAHO pa provee nos cu informacion riba prevencion y tambe ayudo den controla y mehora nos sistema di vigilancia y registracion di malesanan infeccioso, manera por ehempel sarampi.
E prome dos dia nan Dr Karen Lewis-Bell a dedica na haci un evaluacion di e situacion di e programa di vacunacion na Aruba. Dr Lewis-Bell a duna un presentacion na dokternan di cas tocante e menasa di un brote di malesanan infeccioso cu atencion principalmente riba Sarampi Aleman, Bruela, Bruela Congenital y e importancia di señala, diagnostica y raporta esakinan.
Dr Lewis-Bell a ehecuta un “measles outbreak training” cu empleadonan den salud di Departamento di Salud Publico y Wit Gele Kruis. E training ta di sumo importancia mirando con Sarampi Aleman (Mazelen) ta haciendo su entrada bek den cierto regionnan y paisnan cu pa añanan no a mira casonan di Sarampi Aleman. E motibo di esaki ta e campañanan anti-vacuna cu ta causando cu babynan y muchanan ta keda contagia y ta causando brote caminda tin hasta casonan fatal.
Ta asina cu den Caribe y Latino America a presenta casonan recientemente importa di Europa. Merca ta conociendo un brote basta grandi e ultimo simannan. Venezuela y Brazil tambe tin brotenan actualmente. Aruba cu ta un isla turistico no por evita cu un caso di sarampi por drenta, pero si nos ta prepara nos profesionalnan pa atende y reconoce e malesa mas lihe posibel y asina evita brotenan innecesario. E bon di e malesa aki ta cu ta existi un vacuna cu ta duna proteccion di 99% despues cu ricibi e di dos vacuna pa bida largo. Tur esakinan a wordo discuti y atendi pa por actua den caso cu Aruba wordo confronta cu un caso sospechoso y/of confirma.
