Siman pasa a presenta un situacion na ImSan, unda dokter cu tabata cla pa cuminsa un operacion a haya un melding cu urgencia pa un emergencia na Dr. Horacio Oduber Hospital, y e dokter mester a yega pa scapa bida di e pashent.

Dokter y director di ImSan (Instituto medico San Nicolas), Joel Rajnherc a comparti e cooperacion cu ricibi di polis y ambulance pa un caso cu a tuma luga. Un cooperacion cu a resulta positivo y Rajnherc ta agradecido pa cu e situacion aki.

E ta bisa cu ta conoci cu den comunidad hende ta duna comentario negativo na cuerpo policial, bomberonan of ambulance. Sinembargo Rajnherc ta bisa cu cierto comentario ta ‘un falta di respet’, mirando cu ta trata di tres pilar cu ta sostene ‘nos comunidad tremendamente’.

Den e caso aki tabatin un emergencia medico na Aruba, cu e chirurg tabata na warda haciendo un operacion planea na ImSan. Diripiente a ricibi noticia cu tin emergencia grandi na Dr. Horacio Oduber Hospital y e dokter mester a bay cu urgencia.

“Nos sa cu tin un green corridor, pero a pesar di esey, cada minuut por salba e bida di un pashent. Dr. Posner a tuma contacto cu cuerpo policial, el a haya e telefonista na linea y e persona a bisa cu lo haci lo posibel pa yuda ImSan manera cu tabata por”, el a splica

Nan a pidi un begeleiding cu un sirena, pa asina dokter Peterson por a yega hospital na ora. Sinembargo a bisa nan cu esey ta peligroso y pa e motibo a prefera di no haci’e. E ora cuerpo policial a duna otro opcion, esta cu nan mes lo busca Peterson na porta di ImSan y hib’e cu sirena na Horacio Oduber hospital, y ‘esey a tuma luga’.

Rajnherc ta splica cu Peterson y su colega Tromp tabata haci e preparacion pa e pashent yega na ora y hunto por a opera e pashent, pa despues e pashent bay cuido intensivo. Afortunadamente, ‘tur cos a bay bon’.

Un demostracion, segun Rajnherc, cu tin cooperacion den cuido medico. E ta considera cu ‘cuerpo policial a bay over way beyond (mas di locual nan por a haci) y e cuido cu nan a duna ta tremendo’.

El a duna palabra di pabien na tur tres departamento cu a traha hunto. “Esaki ta un di e casonan cu ta mustra con bon por ta riba e isla chikito y pa esaki, danki. E ta un orguyo cu tur partido concerni por a haci esaki. Un prueba positivo”, el a expresa. E problema a haya un solucion y a hiba e dokter pa yuda e pashent.

Rajnher a duna di conoce cu como un isla chikito, tin caso grandi cu e bida di persona ta keda importante. Tampoco mester lubida cu ora manda un pashent afo, ta pa motibo cu cuido medico ta ‘asina bon cu nos ta duna oportunidad di bay afo’.

Den comparacion cu otro isla chikito cu tin comunidad chikito unda no tin tur e cuido cu por ofrece na Aruba, esey ta haci cu hende no por bay afo pa ricibi tratamento. “Un cuido di calidad halto y nos ta orguyoso di tur participante den e cuido. Sea specialista, enfermeronan, boticario y tur sosten di organisacion ta bon. Semper por miho, pero di cada caso nos ta siña evalua y mehora e cuido y nos ta riba bon caminda”, el a expresa.