Dr. Joel Rajnherc riba relacion entre Dr. Horacio Oduber Hospital y IMSAN; IMSAN ta percura pa miyones keda den economia di Aruba sin aumenta peso pa AZV

Cu e relacion entre IMSAN y HOH no ta esun miho a bira hopi cla. Pero segun Director di IMSAN, esey no ta pa motibo di e team di centro medico na San Nicolas.

E team di Instituto Medico San Nicolas ta hopi orguyoso di kico nan a logra y nan ta comparti tur nan informacion cu comunidad. Pero ta haci esaki den forma organico, sin inverti den relacion publico pasobra e fondonan ta bay pa amplia e servicio medico na Aruba. Asina dr. Joel Rajnherc a bisa Bon Dia Aruba. “No a inverti den un ekipo di relacion publico, manera ta e caso na HOH.”

Segun Rajnherc, algo cu HOH a haci bon ta inverti den e sistema di Recurso Humano, AFAS. “HOH a haci tremendo inversion den e programa, mientras cu awor no tin fondo. A haci hopi inversion den EVS, cu ta Electronisch Voorschrijven, pero hasta pa esey no tin placa. Ta cosnan cu mester a haci awor? Hospital, HOH contrario na IMSAN no a corta riba salarionan di e personal. Nunca a participa na e solidaridad, pero IMSAN si (red. e reduccion ta tema di discusion awor aki na HOH).” Pues pa dr. Rajnherc, e ta ironico cu awor cu tin problema, awor Directiva di HOH ta cuminza cu medida pa baha gasto. “Ami semper a bisa mi hendenan, si nos haya e placa bek di AZV pa paga boso, lo boso haya e placa mesora. Nan ta kere mi pasobra mi ta papia honesto cu mi trahadonan.”

IMSAN semper a coopera

E realidad a bin tempo cu tabatin candela na HOH. “A cera Eerste Hulp completo, e salanan di operacion pa motibo di e candela. Tur hende a bin traha na IMSAN. For di IMSAN nos a duna servicio na henter Aruba. HOH a trece tur personal, dokter y enfermero, a trece nan remedinan cu tabatin mester. Y despues di esey, HOH a manda mi un cuenta pa e remedinan cu nan a usa na IMSAN. Esey ta cooperacion? Tabatin caso di un señora cu mester a keda opera den forma di urgencia. Nos no tabata funcional ainda pa e pacient por a keda drumi, pero mester a oper’e. El a yega aki cu ambulance, e ciruhano a yega aki. A opera e pacient, y locual a haci ta cu a laga e señora keda den e sala di operacion, hunto cu dos enfermero pa cuid’e, te ora cu e por a haya luga bek na HOH. Pues ken ta sostene ken?”

Rajnherc kier corda tur hende cu ora cu HOH a yena pa motibo di COVID, IMSAN a cera su servicio pa operacionnan electivo pa manda e personal pa yuda. “Nos a djis cera, pa yuda nan. Pero nos a haya danki. Ora cu e aparato di sterilisa di HOH a daña, nan por a usa di nos. Pero ora cu nos mester di sanger, ta cobra IMSAN 1450 florin pa cada saco di sanger. Y asina mi por sigui.”

Diferencia HOH y IMSAN

Aunke cu na ambos instituto ta haci operacion y ta ofrece tratamento di dialisis, nan tin un pakete diferente di servicio. Hasta den e servicio di dialisis tin diferencia. HOH tin dos ‘shift’ pa dialisis, mientras cu na IMSAN ta core tres ‘shift.’ HOH tabata di manda e extra pacientnan cu mester di dialisis pa Boneiro of Colombia, pero IMSAN a brinda e solucion dor di amplia e posibilidad di un di tres shift. “Tur hende na IMSAN ta haci lo maximo pa evita cu hendenan mester bay afo pa dialisis. “

Mehoracion di cuido mientras cu ta tene placa na Aruba

IMSAN ta brinda e servicio di radioterapia (bestraling) y operacion di retina, cu ta haci innecesario pa manda pacientnan pa e tratamentonan aki den exterior. “Pa fin di Maart, IMSAN lo tin su di 500 persona cu a ricibi su tratamento di radioterapia na Aruba mes. Si tuma un averahe cu un pacient cu mester a bay haya e tratamento den exterior na 50 mil florin mes (Dr. Rajnherc no sa e cifra corecto, a pesar di a pidi p’e), e servicio na IMSAN a scapa Aruba 25 miyon florin di sali di nos economia. Berdad AZV a hisa e presupuesto di IMSAN cu 19 miyon florin. Pero cu e radioterapia a scapa AZV miyones. Mesun cos ta conta cu e operacion di retina.” E Director di IMSAN a bisa cu locual ta haci ta busca e specialidadnan cu Aruba no tin pero ta gasta hopi placa pa manda hende pa exterior. E operacion di wowo tabata un di nan. “Nos a busca forma pa wak con por haci’e na Aruba mes, pa spaar nos pacient na prome luga. Y di dos, e ta beneficia cu e ta mas barata, anto e ta tremendo pa tur hende.”

Hasta si un intervencion ta mas caro na Aruba cu Colombia, a lo largo e ta beneficia Aruba. Den caso di cardiologia, Dr. Casper Lacle y Dr. Dennert ta haci tremendo trabao, segun dr. Rajnherc. Pasobra e resultadonan na Aruba ta miho cu na Colombia. Den otro palabra e ‘return on investment’ na Aruba ta mas halto. Mas hende ta scapa. “Lag’e ta un poco mas caro, pero por lo menos nos hendenan ta haya miho trato.” Esey ta e caso cu e tratamento di bestraling na Aruba, cu ta cu asistencia di Baptist Hospital of South Florida cu ta yuda formula e tratamento pa cada pacient, prome cu cende e mashin. “Esey ta sigura cu e pacientnan na Aruba ta haya e miho calidad di tratamento cu un di e miho mashinnan cu ta existi pa e tratamento rond mundo. E calidad di cuido ta halto.”

Acreditacion JCI

Pa tal motibo mes IMSAN ta den proceso pa busca su acreditacion di JCI, cu ta e Joint Commission International. E ta un organisacion cu ta acredita organisacionnan di cuido di salud y programanan. E expectativa ta cu por logra haya e acreditacion aki pa fin di fin di aña of comienso 2023. Motibo pakico no a hay’e ainda ta pasobra IMSAN a pasa di un centro medico cu ta duna servicio ambulatorio pa uno cu ta un hospital unda pacient ta keda drumi.

“Esey ta un paso mas halto, pa haya e acreditacion como hospital y ta tuma 18 luna mas. Nos ta kere cu pa Augustus por pidi e audit. Nos ta bay pa calidad di cuido. Si nos mester cay bao HOH, cu ta hopi leu di e acreditacion aki, nos ta perde e JCI accreditation,” dr. Joel Rajnherc a finalisa.