Na luna di september, e prome profesionalnan di cuido a registra oficialmente den e registro di AruBIG. Dialuna atardi, Dr. Israel A. Psoner a publica cu e tambe a registra oficialmente den e registro di AruBIG y a ricibi su number di registracion. Den un entrevista pa Bon Dia Aruba Dr. Psoner ta splica un poco kico e registro AruBIG ta encera y tambe pakico esaki ta un logro historico y importante pa e profesionalnan di cuido na Aruba.

E registro AruBIG (Registro di Profesionnan Sanitario di Aruba) ta un registro publico y online estableci pa ley. Solamente personanan inscribi den e registro di AruBIG tin e derecho di utilisa un titulo profesional protegi y y por realisa di forma independiente actonan reserva cu ta forma parti di e profesion, Cualkier persona por consulta e registro pa conoce e estado di y e habilidad di e profesionalnan cu ta registra.

E registro AruBIG (Registro di Profesionnan Sanitario di Aruba) ta un registro publico y online estableci pa ley. Solamente esunnan inscribi den e registro di AruBIG tin e derecho di utilisa un titulo profesional protegi y por realisa di forma independiente actonan reserve cu ta forma parti di e profesion. Cualkier persona por consulta e registro pa conoce e estado di y e habilidad di e profesionalnan cu ta registra.

“Eigenlijk e ta un ley cu ta bisa cu bo ta responsabel pa bo trabao como dokter y no tur hende por yama nan mes dokter den medicina, e ta un titulo protegi”, Dr. Posner a bisa.

E ta splica cu pa hopi aña, e situacion pa dokternan Arubiano cu a studia den exterior, por ehempel na e paisnan di regio, tabata problema pasobra Arubianonan cu a studia na Hulanda ta bin Aruba y nan estudio, door cu nan ta registra den e ley BIG di Hulanda, ta wordo reconoci automaticamente na Aruba. “Pa nos Arubianonan cu a studia den regio, Arubianonan cu a studia na Costa Rica, na Colombia, na Venezuela, nan tabatin un problema semper paso nan a studia bin back, pero nan titulo no ta para den ley”, el a splica. “E ora nan a pasa un ley, Minister Dangui Oduber tabata un di e pushersnan di esey, nan a pasa un ley cu ta bisa si bo a studia den regio nos ta bay introduci AruBig, cual Aruba su Big”.

Na 2017 e ley AruBIG a drenta na vigor, pero e ley mester a wordo yena cu diferente decretonan pa regla e posicion di e diferente profesionalnan den cuido na Aruba. Na februari di 2018 Minister Dangui Oduber a instala e comision di AruBIG, y despues di perseverancia di e Ministerio conhuntamente cu profesionalnan den cuido y departamento di Salud Publico, e logra habri e registronan oficial pa AruBIG.

Dr. Posner ta splica cu pa prome biaha den historia, Arubianonan cu a studia na un otro pais cu no tabata reconoci antes, por registra y wordo reconoci. Esey kiermen cu tur dokter, tur specialista, tur hende cu ta cay bao di e ley ey mester registra awo. “Pa prome biaha den historia bo por bisa OK, mi a studia, mi ta bay manda mi diploma, mi kier wordo reconoci y registra den AruBig”.

Dr. Posner, ken a traha mas cu 30 aña na hospital, y actualmente ta trahando na ImSan, a registra den AruBIG y el a bisa cu e departamento completo di anestesiologia a registra y tambe, tur e dokternan cu ta traha na ImSan ta bay inscribi, pero nan mester traduci nan diplomanan cu ta na Spaño na Hulandes of Ingles.

“Semper bo ta tende cos malo so, esaki ta algo bon pasobra pa e Arubianonan, vooral e coleganan Arubiano cu a studia den regio, e ta un bon noticia cu awo bo por registra na Aruba tambe”, el a agrega.

Dr. Posner a ricibi su carta oficial di registracion di AruBIG, cu tin como fecha 8 di october, y e ta splica cu den e carta ta bisa cu eigenlijk r mester bisa tambe cu e ta un anestesiologo, “mi mag di yama mi mes un anestesiologo na Aruba y mi number ta tal tal y den e carta ta bisa cu eigenlijk un hende por puntra bo, of abo tin cu bis’e cu bo ta registra”.

Dr. Posner ta enfatisa cu aunke actualmente AruBIG ta algo nobo, ta importante pa e profesionalnan di cuido presenta nan diplomanan y asina registra oficialmente den AruBIG.

“Un persona cu a caba di studia, e ta bin y e ta registra, cu antes nan no por a registra pasobra no tin caminda pa bay registra”, el a bisa. “Ami ta un di e cachonan bieunan, mi tin hopi aña caba ta traha y ami ta registra na Hulanda y antes esey no tabata problema pa mi paso e ley ta papia di e BIG di Hulanda, pero por ehempel un otro colega cu a studia na Costa Rica, antes no por registra pasobra na Aruba no tabatin niun caminda pa registra y aworaki si por, bo ta bay na AruBig y bo ta registra”.