Ta conoci e situacion cu Respaldo a confronta siman pasa, ora cu a keda confirma cu tabatin varios pashent positivo den e departamento, y tambe personal di e departamento.

Dokter y director di Respaldo, Hendrikus van Gaalen a duna di conoce cu prome cu henter e sucedido a pasa, nan tabata trata cu pashent cu urgencia, y via telefon tabata atende citanan regular.

El a amplia cu e crisis cu mundo ta pasando aden, incluyendo Aruba, lo dura pa drecha.Sinembargo ta keda importante pa informa bon, y haci caso na instruccion di autoridadnan tocante distanciamento social.

Di e forma aki ta evita cu e brote di malesa ta sigui expande. Van Gaalen ta bisa cu ta importante pa cumpli cu ‘flatten the curve’, mirando cu un hospital so tin na Aruba y no tin otro hospital cerca cu por bay. Teniendo na cuenta cu esnan gramdi y muchanan ta esnan mas vulnerabel.

Van Gaalen ta bisa cu tur esnan cu a keda positivo cu e Coronavirus no a haya sintoma grave, e minoria ta haya problema grandi y tiki di nan ta muri rond di mundo. Esey na Aruba ainda no a yega asina leu. Tambe ta bisa cu si tuma medida corecto ta evita cu por yega asina leu. Pa e motibo aki e ta bisa cu ta importante pa haya e informacion, via rednan social, radio, website cu nan por lesa, diferente metodo cu nan por tende.

Pero ta enfatisa si cu pa tende tur esaki henter dia no ta bon tampoco. E ta bisa cu por keda informa, pero no wak esey henter e dia. “No scucha henter ora e negativo so”, pasobra e por afecta e mente.

E recomendacion di Van Gaalen ta pa bin cu algo nobo y structura cu por distrae e mente cu e pensamento di e futuro. E ta remarca cu e virus aki por keda como un griep cu lo por bin tur aña, pues hende no mester keda enfoca negativo cu mundo lo caba. Na luga di esey mester adapta structura diario, cuminsa cu hobby, no keda wak tur informacion cu tin.

Den caso cu ta haya problema, semper por tuma contacto cu dokter di cas pa conseho of remedi. Nan di Respaldo lo tuma tempo pa reorganisa. E por compronde cu den situacion asina e por traha riba hende nan mente, dunando stress, anshedad, depresion, entre otro.

E situacion financiero ta keda e punto di preocupacion. E ta bisa pa famia keda trankil pasobra pa tur cos tin un situacion den bida . “Mi ta kere ta importante pa nos yuda otro te unda cu nos por.”

E ta menciona tocante hende cu a perde trabou, pa esnan cu ta rond no bira egoista sino yuda den e situacion. E ta bisa cu probresa por causa stress, anto esnan cu no tin placa e situacion lo bira fastioso pa nan.

Pa e motibo aki e ta bisa pa famia keda uni, adapta mas cu otro den e cambio. Pone structura den cas conhunntamente cu yiu. Haci meditacion, busca applicacion di trankilisa of medita. Pone reglanan den cas manera ken ta haci kico na cas, ‘haci rutina nobo manera deporte, actividad’.

Mester tene tambe na un bida saludabel. Respaldo ta consciente di tur locual ta pasando y tin un team cu lo sali pa yuda. Van Gaalen a comparti cu tambe departamento di Asunto Social y tur otro organisacion cu ta duna conseho pa famia ta trahando pa yuda den e crisis.

“Nos ta aki pa hende cu ta malo, pero ta pidi pa persona tene cuenta cu distanciamento social, esey ta nos punto di urgencia. Pues e ta keda importante pa e crisis actual”, Van Gaalen a enfatisa.

Nan lo duna conseho riba medionan di comunicacion y por yama na 281-5000. Nan ultimo conseho lo ta pa hende keda trankil, no keda riba e mesun topico un dia largo cu no ta bon pa salud mental.

Tambe ta bisa cu e ta algo cu ta afecta mundo economicamente, pero tin cu pensa cu ta bin un futuro. “No pensa cu tur ta bay muri, bira malo”. E remarca cu por ta posibel cu mas hende lo bira malo, pero e no ta bay leu y mester sigui wak e futuro. “Mundo a pasa den guera, den pandemia y humanidad a sigui wanta. Cu pasenshi, cooperacion y yuda otro tur cos lo bay bon”, el a menciona.