Durante un conferencia di prensa dilanti di edificio di Parlamento di Aruba, Dr. Hendrik Marsman di Practice for Advanced Dentistry, a denuncia mal uso di AruBig y a acusa parlamentario Arthur Vallejo di manipula procesonan den AZV, DVG y AruBig pa su propio beneficio.

Dr. Marsman a toca e caso di e aresto recien di Dr. Kawaiah splicando cu na october di 2020, el a para dilanti di edificio di DVG na unda cu el a denuncia Kawaiah bisando cu e no tin su papelnan den ordo pa eherce e profesion di dentista.

“Pero ta mi so a keda grita 18 luna largo. Mi a pasa na tur instancia, Minister, DVG, IVA etc. y niun hende kier a scucha. Pero nos por wak despues di 18 luna, e caso caba cu e aresto di Kawaiah”, el a expresa.

Dr. Marsman a denuncia durante su conferencia di prensa dilanti e edificio di Parlamento di Aruba cu, segun su persona, tin un problema grandi desaroyando den e cuido dental na Aruba unda cu a cuminsa cu un negoshi di dentista den AruBig.

Marsman a sigui splica cu compara cu antes aworaki nan a bin cu 16 diferente area di specialidad di dentista caminda cu antes tabatin uno y segun el a indica a cuminsa haci e diferencianan pasobra tin un negoshi a cuminsa den e ramo di dentisteria na Aruba.

El a denuncia cu e prome cu a probecha di e situacion ey ta e parlamentario, Arthur Vallejo, mes y el comenta cu Vallejo a haya un contract cu AZV pa trece un orthodontista y tuma over e consultorio di Kawaiah.

“El a drenta den politica pa yuda e pueblo di Aruba, sirbi e pueblo di Aruba y studiantenan di Aruba cu ta bay studia den region cu asina ora nan caba nan por bin traha na Aruba como profesional y e grupo cu tabata na Aruba caba cu pa mas di 10 aña no por a pasa examen, cu no por a haya trabou of cu a wordo explota pa otro dentistanan existente cu nan mester traha pa salario minimo”, el a menciona.

Esey tabata e motibo di AruBig, Marsman a remarca, pa e dos gruponan ey por eherce nan profesion aki na Aruba despues cu nan caba cu nan estudio. “Aworaki bo ta bezig ta wak cu Vallejo ta trece dentistanan stranhero aden cu AruBig pasobra tur e specialidadnan cu tin den AruBig, e ta trece nan tur Aruba y e no ta treciendo Arubiano, e ta trece stranhero”, el a agrega.

El a señala tambe na universidadnan na Colombia, e universidadnan cu Vallejo a pone den AruBig, a pone anuncionan riba website caminda nan ta busca dentistanan na Colombia cu kier bin traha na Aruba. Segun el a splica, y a laga scucha un audio, e interesadonan por yama un number di telefon aki na Aruba na unda por manda CV pa haya un entrevista pa despues nan regel permiso di e persona pa e por bin traha na Aruba.

Di otro banda, Dr. Marsman a expresa cu e ta contento cu Vallejo a keda cla cu su permiso di kaakchirurg, pero na mesun momento e tabatin un pregunta pe. “Arhtur Vallejo, bo AruBig el a wordo hala aden pa un motibo, ami kier sa, Aruba Dental Society kier sa pakico bo AruBig a wordo hala aden y despues a bolbe haya un otro. Kico ta e motibo? Kico a pasa cu bo AruBig cu a cancel’e y duna bo un otro? Kico a bay malo of kico bo a haya extra cu nos no sa di dje?”.

Pa e motibo aki, y otro factornan, Dr. Marsman a indica, a exigi, cu e parlamentario mester entrega su asiento den Parlamento di Aruba.

Despues di e conferencia di Dr. Marsman, Arthur Vallejo, parlamentario y presidente di e Comision di Salud pa Parlamento, a sali y a duna su comentario y reaccion ariba e acusacionnan di Dr. Marsman den su contra.

“Awe mi ta tuma un tempo pa papia un poco riba mi mes, di mi honestidad, e persona cu ami ta un poco di kico mi ta haci y un poco di loke mi no ta haci of representa”, Vallejo a bisa.

Tocando e puntonan cu Dr. Marsman ta acusa su persona di dje, segun Vallejo a aclara, e no tin ningun contract cu AZV, e no a firma pa introduci e ley di AruBig, ta Minister di Salubridad y Minister di Husticia a firma pa introduci e ley di AruBig y gobernador di Aruba tambe mester firma. El a remarca cu el a colabora den aspectonan clave den e ultimo reformanan di e ley di AruBig, pero e no a traha full e ley cu tur su detayenan y resolucion.

El a subraya cu e ta kere y lo pusha pa e lista di universidadnan permiti den e ley di AruBig di Colombia wordo amplia, “mi ta kere profundamente den esey” el a comenta. El a enfatisa cu e no ta controla e lista aki y cu unico persona cu por agrega nomber di universidad ta Minister di Salubridad y no su persona.

“Ami no tin control di decisionnan diario di DVG, ami no tin control di decisionnan tuma diariamente den AZV, ami no tin influencia den AZV, sigur si lo ta asina mi lo tin un contract pa traha cu AZV sigur hopi aña pasa”, e parlamentario a agrega.

El a splica cu den su funcion loke e ta haci ta manda pregunta por escrito pa minister pa trece claridad ariba asuntonan di interes, e por puntra minister y si tin mester yam’e den sala di Parlamento pa atende cu situacionnan cu nan ta kere ta importante pa mehora, pero el a aclara cu na final ta minister ta tuma decision den su posicion ehecutivo. “Ami no ta tuma decision pa Minister di Salubridad. Ami por controla informacion, number y dato, pero na final minister ta tuma decision ehecutivo”.

Contestando ariba e acusacionnan di Dr. Marsman den su contra, el a declara cu e mester bin cu prueba di loke e ta bisa. “E mester bin cu prueba, tur cos na Aruba den e parti hudicial bo mester bin cu prueba, no solamente papia. Papia ta bunita, kizas e tin hopi bon calidad di papia, pero e mester tin prueba pa argumenta su cosnan cu e ta trece dilanti”, el a remarca.

“Ami kier pa e demostra con ami tin manipulacion den e proceso di AruBig of di inspeccion cu mi posicion di parlamentario actualmente. E mester mustra con ami ta manipulando, no solamente papia”, el a agrega.