Ayera riba rednan social, publico a keda conmociona pa e testimonio di Dr. Anthony Fauci, kende tabata e experto top den malesa contagioso na Merca te cu el a retira for di gobierno na 2022. Durante su testimonio dilanti un sub-comite di Congreso, lidera pa Republicanonan, Fauci a haci declaracionnan controversial tocante origen di pandemia di Covid-19 y e medidanan cu a implementa pa controla pandemia.
Manera CNN ta reporta, e audiencia tabata e prome testimonio publico di Fauci na Capitol Hill desde su retiro di gobierno. El a bira contencioso na cierto momentonan mientras Republicanonan a interoga Fauci riba un cantidad di topico, incluyendo e base pa recomendacionnan di salud publico durante pandemia y origen di e virus.
Den su testimonio, Fauci a atende loke el a bisa tabata “cierto asunto cu a distorsiona seriamente concerniendo mi persona,” particularmente tocante origen di e virus cu a conduci na pandemia di Covid-19.
Origen di e SARS-CoV-2
Na comienso di 2020, Fauci a testigua cu den yamada cu dos cientifico – Jeremy Farrar, director di Welcome Trust na Reino Uni e tempo ey, y Kristian Andersen di Scripps Research – y a inform’e cu nan y otronan tabata preocupa cu e virus cu ta causa Covid-19 por a ser manipula den e laboratorio. E dia despues di e yamadanan aki, Fauci a bisa cu el a participa den un yamada di conferencia cu varios virologo internacional pa discuti manipulacion den e lab of posible transmision di animal pa hende.
Fauci a bisa cu e virologonan den e yamada a dicidi pa examina mas cuidadosamente e secuencia genomico, y a bisa “varios cu prome tabata preocupa tocante manipulacion den laboratorio a bira convenci cu no a manipula e virus intencionalmente.” Fauci a bisa cu e cientificonan a haya cu e escenario mas probable tabata un virus cu a transferi di bestia pa hende, “maske nan a mantene un mente abierto.”
Mientras cu algun di e cientificonan lider cu investiga origen di e virus, incluyendo expertonan di Organisacion Mundial di Salud (WHO), ta kere cu e virus a transmiti di bestia pa hende na China. Algun estudio tambe a bisa cu e teoria cu e virus a scapa di un laboratorio Chines, e Instituto di Virologia na Wuhan, no por wordo descarta.
Un analisis di inteligencia di Merca publica aña pasa a bisa cu ambos origen ta posible, y e comunidad ta keda dividi riba e asunto aki. “Mi no por duna cuenta ni ningun hende por duna cuenta pa otro cosnan cu por ta pasando na China, cu ta e motibo pakico mi semper a bisa y mi ta bisa awo, tene un mente abierto riba kico e origen ta,” Fauci a bisa ayera.
Distancia social
Fauci a clarifica cu e guia di distancia social di 2m duna na comienso di pandemia no a bin di dje sino di CDC, segun NYPost.
Fauci, kende a ripiti e guia durante e pandemia, a yega di bisa cu no tin ciencia tras di esaki – pero e tabata kiermen cu no tin estudio clinico pa proba e guia. El a agrega cu el a kere cu CDC a usa estudionan tocante druppel algun aña atras como motibo pa e guia di distancia di 2m.
Ora CDC a promove e idea di “distancia social” di 2m pa hende cu mester tabata cerca di otro durante pandemia, cientificonan a pensa cu druppelnan grandi contamina lo cay for di aire rapidamente y no por biaha mas leu cu e dos meter. E tempo ey, WHO a recomenda pa hende tene un meter, of 3.3 meter, entre nan. Pero hasta na 2021, cientificonan tabata compronde caba cu e coronavirus ta transporta den aire, loke ta nifica cu e por plama riba particulanan cu por biaha mas leu den aire.
Vacuna
Un declaracion di Fauci cu a causa hopi controversia online tabata tocante vacuna. Manera NYPost a recorda, na 2021 Fauci a bisa: “Ora bo vacuna, bo no ta protege solamente bo propio salud y esun di bo famia, pero tambe bo ta contribui na salud di comunidad door di preveni transmision di e virus den e comunidad. Den otro palabra, bo ta bira un “dead end” pa e virus.”
Sinembargo, ayera Fauci a bisa cu “na comienso claramente [e vacuna] a preveni infeccion den cierto porcentahe di hende, pero e durabilidad di su habilidad pa preveni infeccion no tabata largo, e tabata midi den lunas.”
El a agrega cu “e no a preveni transmision ora e habilidad pa preveni infeccion a disminui.”
