Dr. Fauci ta premira mas “dolor y sufrimento” pa Merca

(AP) – Dr. Anthony Fauci a adverti riba diadomingo cu mas “dolor y sufrimento” ta den bista mirando cu COVID-19 su casonan ta aumentando atrobe y oficialnan ta suplicando e Mericanonan ricibi nan vacuna.

Fauci, e nacion su miho experto den enfermedadnan tambe a expresa cu e no ta mira cu un ciere total lo bira necesario den Merca pa motibo cu tin suficiente hende vacuna pa evita e mesun situacion di durante e pandemia. Sinembargo, el a bisa cu no tin suficiente hende vacuna pa por combati e “brote actual” na e momentonan aki.

Fauci su advertencia ta bin dianan despues cu e Centers for Disease Control and Prevention a cambia su curso di recomenda cu te hasta hendenan cu ya ta vacuna mester bolbe bek na bisti e tapaboca ora di ta paden den partinan di Merca unda cu e variante delta ta causando infeccionnan atrobe. Cu e cambio, oficialnan federal di salud a cita investigacion unda cu hendenan vacuna ta plamando e virus di otronan.

Mayoria di e infeccionnan nobo den Merca ta sigui den mayoria entre hendenan cu te ainda no ta vacuna. E casonan aki yama ‘Breakthrough’ por tuma luga den personanan vacuna, y aunke e mayoria di esakinan ta sinti sintomanan leve of te hasta sin sintoma mes, e investigacion ta demostra cu nan ta carga e mesun cantidad di virus cu e personanan cu no ta vacuna te ainda.

“Nos no ta buscando ni considerando un sciere tocal, pero nos ta mirando e dolor y sufrimento cu lo bin den futuro, pa motibo cu e casonan ta keda subi, cual ta e motibo dicon nos ta keda bisa cada biaha, cu e solucion ta pa tur hende ricibi e vacuna, si nos tur lo a vacuna, esaki no lo ta sosodiendo di e manera cu e ta aworaki,” Fauci a comenta riba ABC su “This Week.”

Segun datonan di 30 di juli di Johns Hopkins University, e averahe di 7 dia pa casonan nobo diario den Merca a subi di 30,887 riba juli 16, pa 77,827 na juli 30. E averahe aki pa e pais su mortonan nobo a subi den e mesun periodo di 253 riba juli 16, pa 358 riba juli 30, aunke e reportahenan di morto generalmente ta bini hopi despues di e infeccion y hopi tempo despues di e hospitalisacion.

Actualmente, 58% di e Mericanonan di 12 aña bay ariba ta completamente vacuna, segun e datonan di Centers for Disease Control and Prevention

Sinembargo, hendenan ta “ricibiendo e mensahe” y cada biaha mas hende ta tumando e decision den bista di e variante delta, pa tuma nan vacuna segun e director di National Institutes of Health Dr. Francis Collins durante CNN su “State of the Union”, unda cu tambe su persona a revela cu e vacunacion a aumenta cu 56% na Merca den e ultimo dos simannan.

Lousiana, cual ta e estado cu e cantidad mas grandi di casonan den e ultimo 14 dianan, a mira vacunacionnan bira tripel den e periodo aki, Collins a agrega.

“Nos tin mester di un manera desespera pa nos pueblo vacuna si nos kier pa e variante delta aki ser controla. Na e momentonan aki e variante aki tin fiesta den nos pais,” Collins a comenta.

Tambe a ser declara pa Collins cu aunke tin perseverancia den e variante delta, e vacunanan ta trahando “sumamente bon” den e reduccion di riesgo di enfermedad serio y hospitalisacion “te hasta 25 biaha mas cu anteriormente sin e vacuna.” E guia pa hendenan cu ya ta vacuna cuminsa bisti tapaboca paden den cierto luganan unda cu e brote ta empeorando, ta mas tanto pa proteha e personanan cu te ainda no ta vacuna y tin un sistema inmunologico comprometi.