Den un conferencia di prensa di ayera, Dr. Daryanani di Hospital Dr. Horacio Oduber a comparti un informacion tocante pashentnan cu no tin relacion cu e malesa di COVID-19.
Di esaki, Daryanani a bisa cu nan ta mirando un caida di 50% den pashentnan cu no ta buscando ayudo den hospital den ultimo tres pa cuatro siman aki. El a señala cu hospital tin miedo cu tin hendenan of pashentnan afo cu ta evita di busca ayudo na hospital pa via di miedo cu lo por contrae e virus COVID-19.
Daryanani a splica cu e esey ta algo incorecto. Ttin pashent na e departamento concerni, pero nan ta den isolacion. Si un persona ta yega na eerstehulp e lo haya cu hende profesional cu ta bon instrui y cu sa precisamente con pa deal cu tur pashent.
Asina mes, el a expresa cu pafo di hospital tin un tent cu un dokter y otro specialista cu lo bay screen y haci algun pregunta. Tambe e persona ta bay cay den e tres categoria, como e persona cu tin sintoma di COVID-19 cu lo wordo poni den isolacion; di dos categoria ta esun cu tin un malesa cu mester bay den eerstehulp, cu ta wordo mira aden pero no den isolacion; y di ultimo ta esun cu no ta presenta un situacion mas grave y mester bay cu su dokter di cas.
Di e pashentnan cu no tin relacion cu COVID-19, el a bisa cu nan no ta presenta na hospital ora nan ta malo. Tambe tin esunnan cu ta bay ora ta mucho laat y e malesa ta hopi avansa y cu ta pone nan mes den peliger.
Tambe ta existi algun di nan cu tin miedo di e medidanan cu gobierno a implementa, specificamente e toque de queda. Despues di 9or di anochi si un persona ta bira malo e no tin opcion. Tin un protocol cu si e persona mester sali for di cas y e ta malo, e tin cu yama e number 100 y mester bisa tur su datonan y dato di e auto pa por bay eerstehulp. Si polis ta para e persona ta wordo registra caba den sistema y ta laga pasa e persona di biaha.
