Tur persona cu nacionalidad Hulandes of stranhero cu firma liber cu ta buscando trabou mester bay registra na Departamento di Progreso Laboral (DPL).
Vocero y PR di DPL, sr. Richenel Stamper a declara na Bon Dia Aruba cu un aspecto cu ta hunga un rol ora cu un persona ta bay registra na DPL pa busca un trabou, tin di haber cu kisas na momento ey no tabatin vacatura disponibel cu ta cuadra cu e deseo of peticion di e trahado.
Logicamente esaki ta pone cu na e momento ey, DPL no tin nada pa ofrece. Pero e ta aclaria cu e persona cu mester di un trabou ta keda registra den nan sistema. Esaki kiermen cu na cualkier momento cu DPL ta haya algo na e nivel di e persona cu a registra, nan ta haya bo aden pa bay traha. P’esey ta importante pa tur persona local (Hulandes of cu firma liber) cu ta buscando trabou bay registra na DPL.
Oportunidad pa trabou t’ey
Sr. Stamper a bisa cu e oportunidad pa haya un trabou t’ey, semper y cuando e persona ta mustra su interes cu e kier traha. Un forma pa mustra esaki ta tumando contacto regularmente cu DPL pa wak si nan por a haya algo pe. Ya cu DPL ta traha a base di loke e mesun persona ta expresa riba e trabou cu e ta desea.
Tin biaha e trahado ta cambia di pensamento y e kier algo otro pa traha. Esaki tambe por –segun vocero di DPL- semper y cuando e ta un funcion realistico. Pero tambe cu e persona por tin un cierto conocemento y experticio di e trabou.
