DPL mester haya confiansa den comunidad bek: Hopi hende ta buscando trabou riba nan mes

Minister di Asunto Social y Labor, Glenbert Croes a duna cuenta dilanti di parlamento riba e maneho cu e ta hibando tocante e crisis plan social pa atende nos problema social. E crisis plan social ta premira pa dos aña, el a bisa.

Durante e tratamento di e presupuesto complementario 2019 cu a keda aproba casi na final di aña pasa, e mandatario ta consciente cu dos aña no ta suficiente pa atende cu e magnitud di nos problema social. “Den realidad e ta bay tuma nos decadas…” el a bisa. Den todo caso e mandatario a informa parlamento cu gobierno a compromete su mes pa confronta e problema aki pa nan por brinda henter comunidad un futuro social nobo.

Encuanto tereno laboral, e cantidad di hende cu tabata solicita pa trabou nan tin registra 485. Mientras cu e cifra di desempleo cu a wordo pidi durante e debate aki den parlamento, e cifra a baha. E mandatario a indica cu e indice di desempleo a baha for di 8.9% pa 7.3%. Mirando cu aña a bolter, e mandatario a compromete su mes pa manda e cifra actualisa manera el a wordo constata durante 2019.

Pa loke ta trata e ultimo encuesta realisa riba nos forsa laboral, e desempleo na 2018 tabata 7.3% cu ta nifica 4068 persona desemplea na Aruba. Esaki compara cu e aña inmediatamente anterior di 8.9% di desempleo.

Encuanto den cual sector ta existi un gran interes pa haya trabou, e mandatario a bisa ‘den honor a la berdad’ y como minister encarga cu Departamento di Progreso Laboral (DPL) nan tin un trabou ainda. Esta pa gana e confiansa di henter nos comunidad. Specialmente pa nan por mira DPL como un instrumento pa yuda nan den e trayecto di haya trabou. “Hopi hende ta buscando trabou riba nan mes,” el a bisa. E sector unda nan ta empleado mas hendenan ta hotel y restaurant. Pero tambe den diferente otro sectornan.

Despues di e situacion cu DPL a pasa aden den pasado durante e gobierno anterior, den e capitulo nobo di DPL nan kier ta e apoyo pa e ciudadano cu ta buscando empleo, segun e mandatario. Pero ainda mester di un trayecto pa yega na e exito aki, manera nan kier tin cu DPL.

“Nos ta realisa cu tin confiansa cu ta keda pa nos bay gana den nos comunidad,” el a bisa.

Pa atende cu esaki nan ta organisando hunto cu e sector empresarial hopi job fair cu a resulta hopi exitoso. Proximamente nan ta bay realisa un job fair cu e hotel Secret cu ta wordo construi na Sero Colorado, y tambe cu aeropuerto. E ta un forma pa catalisa esunnan cu ta desemplea di un forma mas efectivo. E job fair tambe ta bira un escenario pa e dunado di trabou por evalua directamente e talento di nos hendenan, el a laga sa.