Aworaki Ministerio Publico tin cu laga scucha e persona aki (Yellow) y bay over na pone e acusacionnan den su contra y esey ta haci cu e lo permanence encarcela por lo pronto. Na e momento aki ta investigando si esaki lo tuma luga na Aruba mes of si pa motibo di siguridad lo mester encarcel’e otro caminda.
Detencion di mas persona
Ministerio Publico a informa cu a detene un persona mas den e caso aki y probablemente esaki ta e persona cu lo a coopera cu e por a keda tanto tempo scondi, pero mester haci investigacion mas profundo, mira cu ta e persona aki so a yud’e of cu lo tin mas persona envolvi, e ora lo mira e cargo cu lo bin contra e pesona aki tambe. Mester realisa si cu e persona aki tabatin sosten di un of mas persona. Minister di Husticia Arthur Dowers a expresa cu e ta pensa cu tin mas persona envolvi, pasobra pa keda scondi den un area asina, bo mester tin cooperacion di mas hende pa por informa ki ora autoridad ta yega cerca y tambe importante ta pa percura pa e persona tin facilidad pa por keda na bida, cuminda, etc. Kiermen esaki toch ta un trabou bon orkestra door di mas hende, Sr. Dowers a bisa
OM no ta descarta cu den e simannan cu ta sigui por tin mas detencion den e caso teniendo na cuenta e netwerk cu lo a yuda sconde tur e tempo.
Detencion
Tabata pa exactamente 2:10pm cu Polisnan di Arrestatie Team di Cuerpo Policial Aruba, riba ordo di Fiscal y Hues Comisario, a drenta den un cas situa na Weg Sero Blanco cerca di Palo Marga y eyden a detene e homber Milanchelo Nelson Antonio Trenidad, conoci tambe bou di e apodo “Yellow”, naci na Boneiro dia 7 di mei 1985 y biba na Cayenastraat # 20 na San Nicolas. Polis ta sigui expresa cu, lamentablemente e periodo aki a resulta mas largo di locual a spera, pero no obstante e presion halto den comunidad, Polis y Ministerio Publico mester sigui traha den margen di nos codigo di procedemento legal y Hues Comisario ta supervisa tur nan movecionnan pa garantisa cu e interes pa gara e sospechoso no ta crusa den e derecho di otronan.
Te dialuna e paradero exacto di e sospechoso, esta un cas situa na Weg Sero Blanco na San Nicolas cerca di Palo Marga, a bira conoci pa autoridad. Polisnan di e Team di Aresto a yega bon arma na e cas y na un forma tactico a detene e sospechoso y transport’e pa Warda di Polis.
