Siman pasa parlamentario Endy Croes a baha fuerte riba Dowers momento cu den un conferencia di prensa anterior Dowers kier a ple mas santo cu Papa di Roma y a manda pidi sra. Evelyn Wever Croes cu e kier mira contractnan di media pasobra segun Dowers e contractnan ey no ta existi. Wel parlamentario Croes a para careda di Dowers totalmente momento cu el a publica e contractnan cu pruebanan di pago di financiën unda amigonan di Dowers esta PAXI (compania di Patrick Paskel y Xiomara) a strica 1.3 miyon for di gobierno pa marketing. Un contracto pa media monitoring. Nan ta scucha y controla tur media y esunnan cu papia of skirbi contra gobierno, te hasta riba facebook, nan lo skirbi articulo di prensa bek pa contra aresta y defende gobierno. Te hasta creando accountnan falso riba Facebook pa haci un trabou sushi. Tera Group tambe di Patrick Paskel a cobra un otro 8 miyon florin pa mesun meta. Esaki ta un trabou di shishi, cu Dowers tabata gasta miyones di caha di pueblo pa defende su maneho fracasa.
Un maneho fuera di control
Pa nos sorpresa Dowers mes tabata tin contract di mas di 250 mil pa aña cu e dos companianan aki. Mas di 1 miyon florin Dowers su so a regala e 2 companianan aki den e ultimo añanan pa defende su maneho cu tabata fuera di control. Un maneho unda atraco y ladronicia di auto tabata na ordo di dia. Un ex- minister di husticia cu a maneha Aruba pa 8 aña ad hoc, sin ningun plan. Un maneho cu a fracasa totalmente. Un maneho unda Dowers lo bay den historia como esun cu a habri nos frontera, importa tur clase di problema di paisnan bisiña, alaves importando tur sorto di arma cu e resultado cu awe Aruba ta un free for all. Mi ta trece esaki dilanti sin miedo pasobra ta asina ta. E cos aki tin su nomber y fam. Arthur Dowers y AVP. Pero na luga Dowers siña di su pasado y admiti na pueblo pidiendo disculpa manera un cabayero pa por purba crea credibilidad bek, Dowers ta subi e cabay robes y kier sigui ataca gobierno y fraccion di MEP den parlamento uzando tactica di e politica anticua y e politica di AVP, esta e politica di shishi. Por nota si cu ta trata aki di un AVP hopi debilita y zwak, pues un AVP cu a wordo rechasa cu 10 mil voto.
MEP no a mete den investigacion
Dowers a ataca fraccion di MEP di a mete den investigacion relaciona cu un caso hopi doloroso, esta e caso di De Vuyst. Fraccion di MEP ta desmenti esaki categoricamente. Enbes cu Dowers trata na splica pueblo con lo mester bay paga y restaura pais Aruba di e desastro financiero cu e y AVP a laga atras, Dowers ta opta pa hunga su rol di shishi. Ningun momento fraccion di MEP a mete den ningun investigacion. Un miembro di Fraccion cu ta hopi yega na e famia encuestion na un momento a lansa preguntanan comun y coriente puntrando pa e status di investigacion. Fraccion di MEP ta hopi contento cu a logra pone man riba un presunto sospechoso di cual por a compronde publicamente di OM cu e DNA a match. Pues ta di aplaudi cu mediante tecnologia moderno por resolve casonan complica. Fraccion di MEP ta felicita henter e cuerpo di investigacion cu a traha incansablemente riba e caso cual lo trece por lo menos alivio pa e famia alrespecto y trankilidad den pueblo. Duna Cesar loke ta di Cesar. Fraccion di MEP por ta critico den cierto situacion pero ta elogia y aplaudi ora esaki ta na su luga. Un palabra di felicitacion na henter e cuerpo cu a traha riba e caso aki.
