Dowers: ”Dentro di 3 siman comision institui mester duna recomendacion”

Relata cu e caso di dialuna mainta, unda cu a constata morto di hoben Dayron Franken cu lo tin problema cu adiccion y problema mental. Minister encarga cu Husticia Arthur Dowers a bisa di a institui un comision cu lo mester entrega nan recomendacion aki 3 siman tocante con ta trata cu personanan asina aki.

“Nos a haya informacion hopi lihe y a mira reaccion den medionan di prensa tambe cu ta trata un hoben cu tabata sufri di malesa di adiccion y cu tabatin basta problema recientemente den comunidad. Sinembargo mi no ta kere e ta hustifica bou di ningun situacion ora un hende ta causa un problema pa e bira victima den un crimen asina aki. Ta asina cu si un persona forma un peliger pa un hende e persona por defende su mes, sinembargo den e caso aki no tin indicacion cu ta trata di un persona cu a defende su mes, sino un persona cu uza violencia y a uza instrumentonan prohibi pa nos leynan, contra di un persona cu e consecuencia fatal.”

El a sigui bisa cu na e momentonan aki el a pidi tur e informacion di kehonan entrega recientemente contra di e persona aki. Tambe a tuma decision pa institui un comision cu dentro di 3 siman lo mester duna recomendacion na Ministerio di husticia pa con pa trata cu personanan cu ta causa problema continuamente den comunidad cu no por yega na solucion pa nan. “Pasobra cu hopi biaha si ta trata di un malesa of adiccion tin buraco den ley, of no ta uza e leynan di tal manera cu por garantisa cu e persona por haya guia of tratamento den un facilidad unda cu e no ta  forma risico pa comunidad. Ta asina ey cu aña pasa a haci adaptacion na e ley cu ta atende cu personanan cu problema mental. Esey a buta cu Ministerio di Husticia tambe tin algun  instrumentonan adicional pa atende cu e personanan aki. Sinembargo, den e caso specifico aki ta parce cu ningun di e instrumentonan cu tin a wordo uza suficientemente.”

Segun Sr. Dowers, hopi biaha ora cu kier atende cu situacionnan asina aki y soluciona un problema ta tende hendenan ta cuminsa cu critica infunda bisando tocante derecho humano, specificamente ora cu ta papia di hinca un persona den un instancia pa cuido. Tambe hende ta comenta cu e caminda sa ta largo pa busca ayudo. Segun Sr. Dowers si hendenan no ta consciente di e caminda corecto e ora e caminda ta mustra hopi largo. P’esey ta necesario pa den futuro sinta hunto y mira con pa atende cu e casonan aki.

Finalmente ta mira cu mas y mas hende ta haya molester di hende den comunidad y menos hende ta dispuesto pa tolera esaki. “Lamentabel ta cu tin ora e solucionnan mester bin despues di un caso asina aki.”

E mandatario a bisa cu despues cu e comision aki ta cla lo informa den prensa tocante di esaki.