Minister di Husticia Arthur Dowers a tuma un rato ayera durante su conferencia di prensa (riba firmamento di cooperacion di departamentonan di husticia) pa aclara algun rumor en cuanto ta maneho di libera hende for di prizon.
“A cuminsa circula cosnan riba Facebook e dianan aki cu minister di Husticia ta laga hende sali for di prizon y cu esey lo tin un interes politico den dje,” e mandatario ta comenta. E ta obligacion di minister di Husticia pa firma pa un hende por sali di prizon na momento cu esaki bin na remarke pa un korting, segun e mandatario.
Tres manera pa sali di prizon
Ora bo drenta prizon como detenido e ta stipula den ley con bo ta drenta y tambe con bo ta sali. “Minister di Husticia no por yega hinca hende den prizon, si no lo mester di dos prizon manera cu mi a compronde. Y minister no por saca hende zomaar tampoco for di prizon.” E mandatario a splica cu tin tres manera cu bo ta permiti pa sali di prizon: ora cu bo caba bo castigo, via di un korting di un tercer parti di bo castigo unicamente cu bon comportacion den prizon. E di tres posibilidad cu tin ta si prizon ta completamente yen. Dowers: “Si e prizon ta hopi yen nos ta core risico si pasa algo aworaki, anto tene un hende mucho largo den politie cel, hues por bisa cu e persona cu a caba di comete e crimen ey por bay liber sin cu su proceso a cuminsa.” Pues tin e autorisacion legal pa laga e persona bay si el a sinta un tercer parti di su castigo, atrobe cu excepcion di bon comportacion.
Prizon ta yen
E minister ta sigui splica cu awor akinan nan a laga algun local tambe bay liber pasobra cu e prizon ta yen. Nos a yega di puntra KIA pa e cifra di hende cu tin na prizon pero pa motibo di siguridad nan no kier a divulga esaki na nos. E decision di ken ta bay liber ta wordo tuma a base di un lista cu ta ilustra con largo bo ta den prizon y cuanto castigo bo a haya. E hendenan aki ta bin na remarke pero bao di condicion: cu bo ta sali anto no por comete un crimen mas etc. Dowers: “E storianan cu nos a tende e ultimo dianan aki ta cu nos ta laga nan sali pasobra cu nan ta vota pa Dowers. Ami ta corda cu eleccion pasa segun mi MEP a haya mayoria voto den prizon. Segun mi mayoria den prizon no ta vota pa mi. Mi no sa si awo cu nos a haci algun cos pa e prizon cu nan lo vota pa mi. Pero e meta di un minister di Husticia ta pa tene bo pais safe y mantene ley tambe.” E mandatario ta bisa cu ni su persona, polis of hues por dicidi riba nan mes kico nan kier haci. “Loke nos por haci ta unicamente basa riba kico ta stipula den ley. Ora mi tende hende ta conta storia mi ta kere ta importante pa contra aresta e storianan aki. Bo por drenta y sali for di prizon conforme stipulacion di ley anto ningun otro manera.”
Expulsa
E mandatario ta sigui splica cu ta haci esaki principalmente cu hendenan cu ta bin di pafo, pero dado momento esunnan cu ta bin di pafo ta keda expulsa pa bida for di Aruba. “Un hende cu firma liber, permiso of a djis bin como turista, nos ta expulsa nan sin tene cuenta cu nan mester regla algo. Anto esunnan cu nos ta expulsa ora prizon ta yen ta esunnan mas cerca di a caba di sinta nan castigo. Esey ta un cos cu ta pasa cada tanto tempo.”
