Manera Bon Dia a reporta anteriormente, despues di a protesta diabierna atardi, chauffeurnan di truck a marcha direccion di DOW pa confronta e departamento y e contratista pa por bin na un acuerdo pa e situacion na Watty Vos Boulevard. Segun director di DOW Marlon Croes, a yega na un acuerdo entre contratista Mota Engil y representantenan di doñonan di truck.
Director di DOW Marlon Croes hunto cu varios miembro di staff hunto cu e director di e contratista Mota Engil a reuni cu representantenan di esnan cu a protesta. Un splicacion a ser duna di e proyecto Watty Vos Boulevard y con e concepto PPP ta funciona. Segun comunicado di DOW, sr. Croes a demostra comprencion pa e preocupacion di esnan cu a protesta y intermedia pa asina por yega na un acuerdo cu ambos partido por biba cune.
“E promer parti di e solucion ta cu e equiponan cu e contratista a manda busca for di exterior y cu actualmente ta riba tereno di waf na Barcadera, den gran parti lo no ser uso pa awor aki. Suguientemente lo duna oportunidad na esnan cu a protesta pa demostra cu nan tin equipo pa brinda servicio na e contratista Mota Engil trahando riba e projecto Watty Vos Boulevard. E contratista solamente lo ser permiti pa saca e equipo mas pisa y crucial cu ta sumamente necesario pa realisa cu rapides e trabaonan cu ta coriendo cu algun restraso.”, segun sr. Croes.
A ser acorda cu dialuna atardi e grupo di esnan cu a protesta lo bini cu nan lista di equipo pan asina nan por drenta di biaha den negociacion cu e contratista pa trabao. DOW a priminti di lo sigui brinda su asistencia na e situacion cu a surgi pa asina companianan Arubano y nan equiponan haya un oportunidad husto pa participa den proyecto.
