Aunke autoridadnan a haci esfuerso pa preveni cu e lek di diesel for di hospital lo contamina Bubali Plas, un area di naturalesa, nan no a logra finalmente.
“Pa 4or di atardi e team di DOW atendiendo cu e calamidad a constata cu no obstante e esfuersonan realisa toch diesel a drenta logra drenta e canal pa bay na Bubali Plas cual ta menasa seriamente e santuario. Na e momento ey contacto a ser tuma cu e ministro Infrastructura demisionario y alaves e ministro di Infrastructura y Medio Ambiente entrante pa pone nan na altura di e situacion cu a bira mas critico. E decision cu a ser tuma ta pa haci e maximo esfuerso pa salba Bubali Plas. Esey ta encera pa uza mas ekipo y personal pa sigui saca tur e awa contamina di diesel y yena e droogbedden completo y uza tur otro pos disponibel pa mas awa contamina no drenta e sanctuario di parha y pisca. E comision di calamidad a reuni y ta supervisando e esfuersonan aki”, asina DOW ta informa den un relato ayera.
E departamento ta conta cu ayera 8or brandweer a alerta nan cu posiblemente fuel a drenta den e instalacionnan di e planta di purificacion di awa na RWZI Bubali. Procediendo di e lek di diesel na hospital. “ Inmediatamente DOW a activa e crisis team pa drenta den accion y cuminsa investiga y tuma e pasonan necesario pa reduci riesgonan di impacto na Bubali Plas y nos medio ambiente en general.”
Nan a purba di contene e diesel pa no yega e planta di purificacion di Bubali. “Inicialmente no a haya holor e diesel na e planta na Bubali, sinembargo un rato despues na planta na Bubali a nota e prome señalnan di fuel cu a cuminsa manifesta su mes por medio di e holo di e fuel, pues e diesel a yega e planta pero no den e plas di Bubali ainda. Na e momento ey a activa e vacuum trucksnan pa cuminsa saca e awa contamina cu e fuel for di e planta. Nos ingenieronan rapidamente a haci un investigacion y a constata cu no tabata tin señal di fuel ainda den e parti final di procesamento di e planta. Tambe a tuma contacto cu un compania specialisa riba tereno di contaminacion pa por entrega e producto di FFT, cual ta un producto cu ta combati efectonan di fuel den awa. Esaki a ser aplica na e pompstation di Costa Linda y na e entrada di e planta RWZI na Bubali”, asina e departamento ta conta.
E trucknan tabata transportando non stop e awa di riool contamina cu e diesel pa basha esaki den e ‘droogbedden’ cu ta structuranan grandi di concreto cu por contene e awa pa despues e vapora, segun DOW. Pero atardi manera menciona nan a mira cu no por a evita cu diesel lo drenta den e Bubali Plas.
