Den luna di october 2022 Minister di Turismo y Salud Publico, Dangui Oduber, a anuncia e insidious di e proyecto di embeyecemento di Hooiberg como parti di diferente proyectonan cu ta enfoca den e mehoracion y elevacion di producto Aruba.
E proyecto di embeyecimento di Hooiberg tin algun tempo caba canando y durante conferencia di prensa den luna di october aña pasa Minister Oduber a indica cu e proyecto aki mester keda entrega na comienso di e aña aki.
Pero ainda esaki no ta e caso. Por a tuma nota cu ayera riba pagina oficial di Facebook di DOW, a publica un aviso importante pa comunidad di Aruba tocante e proyecto aki.
“Un peticion ta bay na tur persona cu ta bishita Hooiberg, cu ainda tin trabaonan andando. Nos a haya un retraso chikito pa motibo cu persona toch ta subi durante construccion. Trabaonan ta programa pa termina otro siman sino haya niun retraso mas. Por fabor tene cuenta,” e publicacion tabata indica.
Den pasado e prome fase di e proyecto, caminda a drecha e trapi y a renoba e hut na entrada, a wordo realisa cu fondonan di TPEF. Den e fase aki ATA lo financia e remodelacion di e mirador existente.
Tambe, hunto cu TPEF lo drecha e trapi di Hooiberg y lo haci uso di artistanan local cu lo duna e trapi un toke artistico por medio di mosaik. E meta ta pa Hooiberg bira un atraccion colorido pa localnan y turistanan.
Minister Dangui Oduber a menciona, den e conferencia e tempo ey, cu Aruba ta un destinacion di calidad halto y e bishitantenan ta paga hopi placa bin Aruba. P’esey ta importante pa sigui mehora e producto Aruba pa e turistanan por haya e balor pa locual nan ta paga. Tur esaki ta den cuadro di diversificacion di Aruba como destinacion turistico.
