Ayera director di DOW Marlon Croes a informa riba ultimo desaroyonan pa locual ta projecto di Watty Vos Blvd. Ta premira cu den algun dia lo keda cla cu asfalt pa habri e caminda di rotonde nobo na area di Hospital. Sinembargo ainda tin algun retraso pa finalisa e rotonde cu lo bini na Cumana y ambos e area aki DOW ta admiti ta influenciando trafico hopi e ultimo temponan.
Aworakinan e construccionnan tumando luga na rotonde nobo na Cumana y area di Hospital ta esunnan cu ta influenciando e trafico basta hopi segun DOW.
E contratistanan a laga sa cu lo bay caba e trabaonan prome na unda cu ta haci menos influencia pa trafico, anto un pa un lo cuminsa haci e cambionan den e rotondenan segun Marlon Croes. Pa locual ta e projecto di Watty Vos Blvd, tin diferente contratista trahando na diferente caminda. Cumisando for di rotonde di FCCA bayendo direccion di e rotonde nobo di Codemsa tin un retraso tumando luga actualmente. Segun sr. Croes e ta pa motibo di e awasero cu a cay ultimo unda nan a ripara cu nan plan di drenahe di awa ‘no ta esun di mas miho.’
Croes: “Nan a bin cu un consultante Hulandes pa bin haci tur e simulacionnan necesario pa garantisa cu ora awa yobe, e drenahe traha bon pa e caminda no yena cu awa.” Nan ta wardando awo pa e informacion aki drenta bek for di Hulanda segun sr. Croes pa adapta e plan y asina tambe caba e trabao.
Rotonde nobo na Hospital
E rotonde nobo cu lo bin na area di hospital na Sasaki ta bao di construccion pa basta tempo caba. E ta un proyecto cu ta forma parti di e PPP Watty Vos Blvd manera conoci caba. Segun sr. Croes, nan a haci diferente cambio den e infrastructura pa locual ta kabelnan di utilidad, tuberianan di WEB y facilidadnan cu den futuro lo mester di dje. E ta sigui bisa cu nan a traha tur e formanan caba anto locual falta awo ta pa pone asfalt. E intencion pues pa nan asfalta e area prome cu nan baha cu vakantie. E contratistanan a informa diamars cu nan ta bay haci un intento pa asfalta tur cos pa diabierna pa asina por habri e rotonde aki pa publico por uza. “Tabata tin algun complicacion e ultimo simannan cu e planta. Esey a trece un retraso den trabao. ” Y ta mustra cu e planta a keda cla cu si tur cos ta bon nan lo mester a start asfalta caba desde ayera pa por caba cu e trabao aki den fin di siman.
Diferente trabaonan
E camindanan nobo entre Seroe Patrishi cu Tanki Leendert ya a haya asfalt, y tambe parcialmente entre Tanki Leendert cu Ponton. Awor ta habriendo e fundeshi entre Ponton bayendo direccion Schotlandstraat, cerca di Ling & Sons. Pronto manera cu caba eynan lo asfalta esey tambe. Ta preparando tambe pa e otro rotondenan. Manera cu e trabaonan caba na e rotonde di area di Hospital, lo bay move otro aña pa e luz di trafico di Superfood wordo converti den un rotonde tambe. “Pa asina nos por brinda mas capacidad y siguridad pa automobilistanan y peaton cu ta crusa caya for di hotel y bay Superfood y vice versa.” Sr. Croes a toca riba trabaonan cu ta andando tambe na Caya Ernesto Petronia, for di e rotonde di Ponton bayendo direccion di Citgo Ponton. Tur contratista ta haciendo diferente trabao pa asina nan por gana tempo y purba di menos obstaculisa e trafico cu ta posibel segun sr. Croes.
Cera tur buraconan
Mirando cu DOW tin diferente trabao andando, nan tin trabao den Paradijswijk unda cu lo cuminsa cera partinan cu tin habri pa dianan di fiesta. Pues lo purba di no laga e cayanan habri pa molestia e barionan, ta cera e areanan debidamente pa sigui otro aña. Esey tambe ta conta pa tur trabaonan di utilidadnan. DOW ta supervisa tur e trabaonan aki anto a duna instruccion caba pa no habri caya mas y coba. Pero pa awo concentra mas riba cera tur e buraconan pa asina tin miho fluho di trafico y pa hende por cana cu menos molester durante dianan di fiesta.
Contract nobo cu contratistanan
Sr. Croes ta bisa cu recientemente nan (DOW) a firma un contract cu e contratistanan unda cu a cambia cierto parti di e trabaonan. A introduci vakantie bao di contratistanan chikito. Segun leynan laboral manera ta conoci, bo tin cu tuma sikiera 15 dia di vakantie pa aña. Esey a trece cu ne cu hopi di e contratistanan tabata traha hopi sin bay vakantie pasobra nan ta bisa cu nan no ta haya pago. Pues nan a yega na un contract nobo unda cu nan ta bay tres siman vakantie, dos biaha pa aña. Un grupo ta bay den luna di juli anto e otro den december, anto ta bolter esakinan cu cambio di aña pa tur por gosa di e dianan di vakantie stipula. Naturalmente un suma ta bay resta for di dje y sr. Croes ta bisa cu nan a pone un incentiva den dje. Si bo ta wordo bon cualifica den e scoring sheet, bo ta bin na remarke pa haya un bonus chikito y cosnan asina segun sr. Croes. “Pa via di un mal communicacion/mal entendimiento, nan a pensa cu lo haya esaki automaticamente pero esaki ta bay ‘performance based.’
