DOW ta riba e problema grandi di buraco den camindanan pero ta admiti cu si awa no ta stop di yobe, ‘nos ta keda den problema’.

Marlon Jacobs, hefe di seccion di Infrastructura y Trafico na DOW, a duna un declaracion den cual a papia di e plannan cu tin pa mehoracion di careteranan di Aruba. Esaki ta informacion for di e relato di DOW. E departamento ta dispone di e ekipo pa recicla un caminda. Ta simplemente hiba e aparato na cierto area y recicla e caminda, sin cu mester saca fundeshi, segun nan. Ta haci e parti mas abou mas solido y asfalta e parti ariba  di nobo. Esaki lo yuda pa mantene e gastonan mas abou posibel. Ta preparando pa haci debido uzo di e aparato en cuestion. E management team tambe lo yuda yega na e formula cua ta e camindanan cu mester bini prome na remarca pa renobacion y pakico. Den cuadro di yobida fuerte, sr. Jacobs ta splica cu mientrastanto a aumenta e capacidad na maximo pa drechamento di buraco. Nan ta uzando 4 truck, cada un cu un capacidad di 4 ton di material cu ta sali tur dia pa areanan rond di Aruba. E capacidad di e trucknan ta net pa un dia di trabou. “Awa mester stop di yobe, sino nos ta keda cu e problema,” Jacobs a enfatisa.  E ta splica cu buraco riba camindanan relativamente nobo y principal ta wordo corta y yena cu asfalt, na luga di e sistema di basha asfalt so den e buraco.

Inversion di 10 miyon necesario
DOW tin un ekipo di experto cu ta e “Assess Management Team” cu ta haci evaluacion cual ta e careteranan cu por wordo gepatch y cual nan definitivamente mester wordo renoba y si tin camindanan di santo cu ta miho pa basha un capa di azeta riba dje. Sr. Jacobs ta splica cu e “Assess Management Team”  ta yuda traha un Plan di accion pa e 200 km di caminda cu mester wordo evalua y cual nan caminda ta e prome nan cu mester bini na remarca pa renobacion. Pa e plan di accion mester tin tambe e financiamento necesario y esaki ta core den algun dies miyon florin. Den e ultimo añanan DOW a inverti rond di 15 pa 18 miyon florin pa aña den reconstruccion y rehabilitacion di camindanan. E funcionario a splica, cu infrastructura no ta solamente construi caminda, pero mester construi acera, borchi, luz di trafico, rotonde, drempel y tin biaha mester tene cuenta cu greppelnan na banda pa fluho di awa. Tur esaki ta cay den e gasto di infrastructura pa caminda. Pero e inversion mas costoso naturalmente ta e camindanan di asfalt, unda un mantencion na tempo ta baha e gastonan a largo plaso.