Havenstraat tin nos atencion, director di DOW Marlon Croes a declara na Bon Dia riba e situacion di pavers cu a zink den Havenstraat.
E caminda di pavers na Havenstraat cuminsando na tienda di Zara bayendo direccion parada di bus grandi ta den boca di pueblo pa algun tempo caba. Algun dia atras nos redaccion a bay saca algun potret di e caminda aki cu aparentemente ta keda bay atras cu pavers cu ta zink den otro. E paversnan cu ta zink ta un fenomeno cu nos redaccion a tuma nota cu tambe tin den cierto area di Caya Betico Croes mes. Pero na Havenstraat e caminda ta keda bay atras te na un nivel cu el a bira hopi fastioso pa core riba dje. Esaki ta haci cu ora bo ta core riba e caminda aki ta mescos bo ta riba un cabay riba un caminda di tera, segun un automobilista a remarca na Bon Dia. Ora cu nos a bolbe bay tira un bista riba e caminda aki siman pasa, un comerciante di un di e tiendanan a saca cabes y grita nos redaccion: “Porfin, porfin!” Den otro palabra, e comerciante tabata contento di mira cu porfin tin atencion riba e caminda pa algo wordo haci cu ne. Nos redaccion por a tuma nota tambe e rato cu nos tabata eynan ta saca potret cu algun automobilista ta opta pa hasta tuma e otro caminda banda di dje (e caminda traha pa e tram core) pa asina evita di pasa riba e caminda aki.
DOW: ‘Mester wak kico ta e problema’
Director di DOW ta splica Bon Dia cu nan mester a haci basta trabao prome cu eleccion unda cu nan schema tabata practicamente full. Nan tabata tin programa pa haci trabao riba e caminda aki den luna di october. Nan a inventarisa e problema segun sr. Croes unda cu nan mester bay coba e area pa a base di esey determina kico ta e problema den e subsuelo. Pues pa wak si lo tin un lekmento di awa cu ta core y muha e fundeshi cu e ta bira menos stabiel. Mester wak si e ta un rioolering of tuberia di WEB cu por ta e problema pa asina por drecha esaki di biaha segun e director.
Ora caba di traha riba e fundeshi, DOW kier haci stabilisacion cu santo cual ta un mescla di santo cu cement y no lo wordo afecta pa awa y garantisa cu e calidad di e caretera ta bay mas largo.”Tin un discusion interno andando si nos tin cu kita e paversnan anto asfalta e caminda completo, of bay na mantene e plan manera cu e ta aworaki.” E pavers ta un parti di diseño cu intencion pa conecta e plasa panort di Renaissance Hotel cu e plasa Daniel Leo por medio di diseñonan pa tene nan hunto visualmente.
