DOW ta percura pa e parti logistica di e diferente urna durante di eleccion politico. Sinembargo no ta DOW tin trabao den e parti aki pero conhuntamente a sinta cu CENSO , CBS y bureau rampenbestrijding Aruba unda cu a elabora riba e puntonan delinea den cua direccion ta bay atende cu eleccion e aña aki.
Director di DOW Marlon Croes ta duna di conoce cu DOW tabata prepara pa luna di september , pero mirando e cambionan cu a tuma luga e eleccion politico ta tuma luga hopi mas tempran. Na final di juni ta conoci cu eleccion politico na Aruba lo tuma luga y pa e motibo aki mes DOW ta mobilisando y haci bishita na tur urna pa asina mira e situacion y asina pone tambe acerca e reglanan di COVID na tur urna , te na e momentonan aki ta deliberando e cantidad di urna si nan lo bira mas of cu nan lo keda mes un cos y cada un di e urnanan mester ta bon ekipa cu e exigencianan di e pandemia.
Sinembargo director di DOW ta kere cu ta prudente pa aumenta e cantidad di urna pa asina baha e cantidad di persona cu ta bin vota na un urna, pero tur e puntonan aki ta den deliberacion pa asina un decision keda tuma. DOW su rol ta cuminsa na momento cu e team tuma e decision cua ta e urnanan , DOW lo haci bishita na e urnanan scogi y lo papia cu e cabesantenan di scol y pidi e edificio pa nan por coopera cu DOW y na momento cu nan bay diacuerdo DOW lo cuminsa anota con lo ahusta e situacion pa e dia di eleccion.
Dow lo controla si tur e airconan ta funcionando, awa, coriente, telefon y wifi ta funciona . Tambe ta mira si e accesibilidad pa trafico pafo di e urna ta bon unda cu lo pone borchinan pa indica pa asina e trafico por core mas lihe y no tin aglomeracion. DOW lo percura pa e logistica y lo percura pa tur cos ta na su luga pa e momento.
Eleccion ta diabierna 25 di juni pero scol ta cera 24 di juni, sinembargo normalmente DOW tin mester di e edificio un dia prome pa por tin tur cos prepara. Sinembargo e decision ainda no a keda tuma si scol lo caba un dia mas tempran. Loke ta un realidad , manera tur eleccion DOW ta uza e edificio pa set tur cos un dia prome cu ta diahuebs 24 cu ta un dia prome cu eleccion , pero tambe ta dia di dera gai.
Loke cu tambe ta remarcabel tur aña ta cu partidonan politico ta pega sticker y of bandera na luznan di trafico, esaki no tin mag, pero na e momentonan aki cuerpo policial ya caba ta sinta na mesa cu e partidonan y tur e puntonan aki tambe ta bin padilanti di kico por y kico no por. DOW tambe na su turno lo sinta cu KPA y lo elabora riba tur e aspectonan aki . Tur material publico ta prohibi pa pega sticker of bandera na nan.
