Durante un conferencia di prensa Swinda Dijkhoff, lider di proyecto na Departamento di Obra Publico (DOW) y manager di proyecto Green Corridor y Watty Vos Boulevard a elabora riba e matanan di fruta cu a bisa cu lo wordo planta den e espacio di e dos proyectonan aki.

Sra. Dijkhoff a splica cu DOW a evalua den cuminsamento di ehecucion di e proyecto si esaki lo ta factibel pa por ehecuta. Tambe e departamento a evalua si ehecuta e aspecto aki di e proyecto lo cumpli cu normanan di siguridad. E departamento tabatin entre otro preocupacion pa siguridad den trafico ora autonan tin di haci birada. E problema aki ta bin si mester pone mata di fruta mey mey di caminda. “Si bo pon’e na cant’i caminda of banda di un cas e no ta problema.”

Pues e departamento a dicidi di uza otro matanan tipico na Aruba, cual ta splica e aloe y cadushi cu ta linea e caretera di e proyecto. Esaki segun sra. Dijkhoff a bin pasobra tin un Decreto Nacional cu ta urgi e departamento pa uza mas mata nativo cu ta posibel. E rason cu nan a scoge aloe cu cadushi pa planta mey mey di caminda ta pasobra e departamento a haya inesperadamente cu mester tene cuenta cu kabelnan di Elmar cu ta pasa bou di e caminda.

“Nos mester a evalua e ora ey si nos ta keda cu e riesgo cu nos ta laga Aruba sin coriente si un reis di e matanan mester touch e kabelnan, of nos ta uza matanan chikito cu no ta bay bou tera asina hopi cu nan reis”.

Apart di esaki e departamento a haya un sorpresa cu tubonan di WEB tambe ta pasa bou di e caretera, cual nan no a wordo poni na altura di nan existencia. “Nos a haya diferente cosnan inespera durante ehecucion di e proyecto.” Pues cada biaha cu a bin un desaroyo nobo mester a sinta hunto cu e contratistanan pa asina evalua bek kico lo ta e siguiente stap.

E kabelnan aki segun sra. Dijkhoff ta esencial y ta conecta planta di Elmar cu area hotelero, entre otro.

Sinembargo sra. Dijkhoff a splica cu tin discusion ainda tumando luga entre DOW y Alex Amalfi di Caribbean Infrastructure Company (CIC). Ainda falta algun 4000 mata cu mester wordo planta den henter e proyecto di Green Corridor.

Sra. Dijkhoff a finalisa bisando cu e mantencion di e vegetacion den e area di e proyecto ta cay pa e contratistanan CIC y Odinsa, den area di Green Corridor y Watty Vos Boulevard respectivamente.

Esaki ta parti di e contracto cu tin entre pais Aruba y e contratistanan, den cuadro di e proyecto Public-Private Partnership (PPP). Esaki ta encera cu e contratista ta esun responsabel pa ehecucion y mantencion di e proyecto pa 18 aña na Green Corridor y 20 aña na Watty Vos Boulevard. Pais Aruba pues lo ta responsabel pa percura cu e condicionnan di e contracto wordo cumpli cu ne. Y despues di e 18 aña e responsabilidad pa mantencion ta cay bek pa pais Aruba.

Mangelnan na Savaneta

Director di DOW Marlon Croes a elabora tambe riba e situacion di mangelnan na Savaneta cu a causa un furor den comunidad siman pasa. Sr. Croes a splica cu e departamento hunto cu Directie Natuur en Milieu (DNM) ta cabando e rapportnan pa loke ta trata e mangelnan den e area aki. E departamento lo dedica un conferencia di prensa specialmente pa e topico aki e siman venidero, pues nos lo sigui riba e desaroyonan cu bin cu e storia aki.

“Nos lo duna un contesta riba kico a sosode y kico ta bay pasa siguientemente”. Mas cu esaki sr. Croes no kier a comenta y a referi prensa na e conferencia cu el a priminti lo tuma luga e siman aki.