DOW: nos no ta pone ni kita borchinan sin autorisacion di polis

Director di DOW, Marlon Croes a aclaria cu e departamento aki no ta pone of kita un borchi sin autorisacion debido di polis. Solamente den caso di mantencion DOW ta cambia un borchi pa otro similar.

Sinembargo  sr. Croes a bisa cu nan ta asombra di e declaracion di cuerpo policial tocante e accion di protesta di e tour operator dilanti di waf di crucero diamars ultimo.  E ta haya cu akinan tabatin un falta di comunicacion interno den e cuerpo policial, y e ta kere cu nan mester elabora riba dje.

Den e declaracion aki –segun sr. Croes- a wordo menciona cu DOW lo haci cambio riba borchi di trafico y esaki a causa tur e problematica caminda  e tour operator a cera e entrada di e waf di Oranjestad como forma di protesta pa e instalacion di borchi cu nan ta haya no apropia pa nan por haci nan trabou.

El a bisa cu DOW riba propio iniciativa por cambia un borchi bou dos condicion: E prome ta si e borchi ta blikia cu nan informacion ta bay perdi, nan ta reemplasa cu un borchi similar locual ta un trabou di mantencion. E di dos ta si un auto ta dal un borchi, e ta tarea di DOW di lanta e borchi y pone un borchi nobo den su luga cu e mesun indicacion.

Den caso cu nan ta observa un situacion afo cu ta causando problema, DOW ta tuma e iniciativa di acerca cuerpo policial pa pone nan na altura di e situacion of desaroyo no faborabel  pa e bon funcionamento. Nan por elabora riba e situacion aki pa dicidi si nan ta bay e borchi si of no.  Den e caso specifico aki na waf di Oranjestad, sr. Croes a bisa cu e agente di polis Bosch a acerca e funcionario di DOW, Jaime Trimon cu e peticion pa cambia dos borchi pasobra ‘e ta wak e funcionamento no ta bay corecto’.

El a bisa cu a base di e peticion ya cu DOW tin un bon relacion cu cuerpo policial, nan a realisa e trabou di cambia e borchi.  Sr. Croes a enfatisa cu DOW tin un bon relacion cu cuerpo policial ya cu den hopi trabou nan a traha hunto.  Pero considerando e incidente di e cambio di borchi den e area di e  waf di crucero, nan ta bay tuma contacto cu comisario di polis pa establece un protocol. Pa medio di e protocol aki nan ta deal cu otro den adelante pa evita e tipo di declaracion aki den direccion di e DOW aki, el a bisa.